Samarqand viloyati Payariq tumanidagi G‘allakor qishlog‘ida yashovchi o‘quvchilar maktabga borish uchun 10 daraja sovuqda 7 kilometr masofani ikki soatda bosib o‘tmoqda. O‘quvchilar maktabga yetgunga qadar to‘satdan suv kelishi mumkin bo‘lgan soydan o‘tadi. Ota-onalar bolalari maktabga yetib borgunga qadar, ularni bo‘ri yeb qo‘yishidan ham xavotirda. Bu haqda MY5 telekanalining “Markaziy studiya” axborot dasturi xabar berdi.
Xabar berilishicha, avval qishloq markazida maktab bo‘lgan, biroq u ishlashga yaroqsiz deb topilib buzib tashlangan.
Aholi vakillarining ma’lum qilishicha, Payariq tumani sobiq hokimi mazkur maktabni ta’mirlash uchun 70 million so‘m ajratishni va’da qilgan, biroq bu va’dasini uch yil davomida bajarmagan. Tuman hokimiga murojaatlar esa natijasiz qolgan.
Eski maktab buzilib, 2015-yilda qishloqqa uzoqroq bo‘lgan joyda yangi maktab qurib berilgan.
Qishloqdan maktabgacha bo‘lgan masofada to‘satdan katta suv kelishi mumkin bo‘lgan sel yo‘li va bo‘rilar xavfi mavjud.
Tuman hokimining ma’lum qilishicha, hokimlik maktab qurilishiga rozi. Buning uchun xalq ta’limi bo‘limi tomonidan taklif kiritilishi zarur.
Izoh (0)