Jamoat transporti tizimda qishli-qirovli kunlarga ancha avvaldan tayyorgarlik boshlangan, deb xabar bermoqda “Toshshahartransxizmat” AJ matbuot xizmati.
Xususan, avtobuslarning dvigatel qismini sovitish tizimidagi suyuqliklarni (antifriz) yangilash, yo‘lovchilarga qulay bo‘lishi uchun isitish pechlarini ko‘zdan kechirish va boshqa tashkiliy ishlar o‘z vaqtida amalga oshirildi. 25-noyabr, dushanba kuni havo harorati keskin pasayib ketganiga qaramay avtobuslar yo‘nalishlarga soz va yetarli darajada chiqarilgan.
Biroq qayd etilishicha, yo‘llardagi tirbandlik, yaxmalak sabab harakatlanish cheklanganligi tufayli yo‘nalishlarda yo‘lovchi oqimi ortgani va bekatlarda yo‘lovchilarning yig‘ilib qolish holatlari ham kuzatilgan. Yo‘lovchilarga noqulaylik tug‘dirgan bunday vaziyatlar o‘z vaqtida bartaraf etilmoqda.
“Aziz yo‘lovchilar va haydovchilar. Yirik hajmdagi avtobuslarni bunday ob-havo sharoitida boshqarish murakkab ekanligini hisobga olib, uning harakatiga xalaqit bermasligingizni so‘rab qolardik. Zero, birgina xato ko‘plab yo‘lovchilarning aziyatiga sabab bo‘lishi mumkin”, — deyiladi xabarda.
Izoh (0)