Erondagi namoyishlar hibsga olingan bezorilar har bir o‘t qo‘yilgan bino uchun 60 dollar pul berilganini tan oldi

Erondagi norozilik namoyishlari vaqtida politsiya qo‘lga tushirgan bezorilar o‘t qo‘yilgan har bir bino uchun 60 AQSh dollari miqdorida mukofotga ega bo‘lganini tan oldi. Bu haqda Eron xavfsizlik xizmati xodimining ma’lumotiga asoslanib “Iran.ru” xabar tarqatgan.

“Viloyatlardan birida hibsga olingan bezori binoga o‘t qo‘yishi uchun 300 000 toman (30 AQSh dollari) avans olgani, ish bitganidan keyin yana 300 000 toman va’da qilinganini tan oldi”, — deydi Hamadon viloyatidagi xavfsizlik xizmati xodimlaridan biri.

19-noyabrda huquq-tartibot organlari brigadasi generali Baxsh Ali Komroniy Solih ham ushbu ma’lumotlarni tasdiqlagan. U noroziliklar vaqtida bu kabi uyushtirilgan salbiy holatlarni oldini olish uchun ham fuqarolar ogohligini kuchaytirish lozimligini ta’kidlagan.

Sud hokimiyati vakili G‘ulom Husayn Ismoiliy 19-noyabr, seshanbada qilgan bayonotida mamlakatda norozilik namoyishlaridan keyin tinchlik hukmronlik qilayotganini bildirgan.

“Eron oliy yetakchisining tavsiyalari, xavfsizlik kuchlari, huquq-tartibot idoralarining harakatlari va norozilik namoyishlarida ishtirok etayotgan yovuz niyatli hamda yo‘ldan adashgan odamlarga qo‘shilmagan fuqarolarning hushyorligi sabab mamlakatda tinchlik o‘rnatildi. Ko‘plab fitnachi va qo‘zg‘alonchi odamlar aniqlanib, qo‘lga tushirildi. Ular davlat binolariga o‘t qo‘ygan va ko‘p joylarni vayron qilishga uringan”, — deya ta’kidlagan Ismoiliy.

Eron razvedka organlarining ma’lumotga ko‘ra 15-noyabr oqshomida boshlangan namoyishlar va mitinglarda 87 000 nafarga yaqin fuqaro ishtirok etgan va norozilik bildirgan xalqning asosiy qismini erkaklar (93 foiz) tashkil etgan. Qonuniy yo‘l bilan norozilik bildirgan fuqarolarning asosiy qismi markaziy ko‘chalarda harakatlangan va davlat yoki xususiy mulk obyektlariga ziyon yetkazgan fitnakor olomonga qo‘shilmagan.

“Qo‘zg‘alon ko‘targanlarning ayyorona harakat qilgani va politsiyachilarga nisbatan tajovuzkor bo‘lgani, ularning yaxshi tayyorgalikka ega bunday vaziyat bo‘lishini kutib yurgan fitnachilar ekanligini bildiradi. Ular benzin oshishidan hayron bo‘lgan odatiy odamlardan farqlanadi”, - deyiladi hisobotda.

Hisobotdagi ma’lumot bo‘yicha, yig‘ilishlarda 50 dan 1500 gacha odam to‘plangan, namoyishlar shaharlar va qishloqlar soni 1080 ta bo‘lgan mamlakatning 100 ta shahar va qishloqlarida o‘tkazilgan. Hisobotga ko‘ra kuch ishlatilgan reydlar va keltirilgan zarar 2018-yildagiga nisbatan ko‘proq bo‘lgan.

Xuzeston, Tehron, Fors va Kermon viloyatlaridagi binolarga jiddiy zarar yetgan. Halok bo‘lganlar sonining ko‘pligi qurollangan jinoyatchilarning neft bazalari va harbiy markazlarga hujum uyushtirgani bilan bog‘liq. Ushbu hujumlar oqibatida bir nechta politsiyachi va “Basij” mirshablari halok bo‘lgan.

Mamlakat bo‘ylab mingga yaqin odam hibsga olingan, 100 ta bank va 57 ta katta do‘kon yoqib yuborilgan. Viloyatlarning biridagi do‘kon talon-taroj qilingan.