Эрондаги намойишлар ҳибсга олинган безорилар ҳар бир ўт қўйилган бино учун 60 доллар пул берилганини тан олди

Эрондаги норозилик намойишлари вақтида полиция қўлга туширган безорилар ўт қўйилган ҳар бир бино учун 60 АҚШ доллари миқдорида мукофотга эга бўлганини тан олди. Бу ҳақда Эрон хавфсизлик хизмати ходимининг маълумотига асосланиб «Iran.ru» хабар тарқатган.

«Вилоятлардан бирида ҳибсга олинган безори бинога ўт қўйиши учун 300 000 томан (30 АҚШ доллари) аванс олгани, иш битганидан кейин яна 300 000 томан ваъда қилинганини тан олди», — дейди Ҳамадон вилоятидаги хавфсизлик хизмати ходимларидан бири.

19 ноябрда ҳуқуқ-тартибот органлари бригадаси генерали Бахш Али Комроний Солиҳ ҳам ушбу маълумотларни тасдиқлаган. У норозиликлар вақтида бу каби уюштирилган салбий ҳолатларни олдини олиш учун ҳам фуқаролар огоҳлигини кучайтириш лозимлигини таъкидлаган.

Суд ҳокимияти вакили Ғулом Ҳусайн Исмоилий 19 ноябрь, сешанбада қилган баёнотида мамлакатда норозилик намойишларидан кейин тинчлик ҳукмронлик қилаётганини билдирган.

«Эрон олий етакчисининг тавсиялари, хавфсизлик кучлари, ҳуқуқ-тартибот идораларининг ҳаракатлари ва норозилик намойишларида иштирок этаётган ёвуз ниятли ҳамда йўлдан адашган одамларга қўшилмаган фуқароларнинг ҳушёрлиги сабаб мамлакатда тинчлик ўрнатилди. Кўплаб фитначи ва қўзғалончи одамлар аниқланиб, қўлга туширилди. Улар давлат биноларига ўт қўйган ва кўп жойларни вайрон қилишга уринган», — дея таъкидлаган Исмоилий.

Эрон разведка органларининг маълумотга кўра 15 ноябрь оқшомида бошланган намойишлар ва митингларда 87 000 нафарга яқин фуқаро иштирок этган ва норозилик билдирган халқнинг асосий қисмини эркаклар (93 фоиз) ташкил этган. Қонуний йўл билан норозилик билдирган фуқароларнинг асосий қисми марказий кўчаларда ҳаракатланган ва давлат ёки хусусий мулк объектларига зиён етказган фитнакор оломонга қўшилмаган.

«Қўзғалон кўтарганларнинг айёрона ҳаракат қилгани ва полициячиларга нисбатан тажовузкор бўлгани, уларнинг яхши тайёргаликка эга бундай вазият бўлишини кутиб юрган фитначилар эканлигини билдиради. Улар бензин ошишидан ҳайрон бўлган одатий одамлардан фарқланади», - дейилади ҳисоботда.

Ҳисоботдаги маълумот бўйича, йиғилишларда 50 дан 1500 гача одам тўпланган, намойишлар шаҳарлар ва қишлоқлар сони 1080 та бўлган мамлакатнинг 100 та шаҳар ва қишлоқларида ўтказилган. Ҳисоботга кўра куч ишлатилган рейдлар ва келтирилган зарар 2018 йилдагига нисбатан кўпроқ бўлган.

Хузестон, Теҳрон, Форс ва Кермон вилоятларидаги биноларга жиддий зарар етган. Ҳалок бўлганлар сонининг кўплиги қуролланган жиноятчиларнинг нефть базалари ва ҳарбий марказларга ҳужум уюштиргани билан боғлиқ. Ушбу ҳужумлар оқибатида бир нечта полициячи ва «Басиж» миршаблари ҳалок бўлган.

Мамлакат бўйлаб мингга яқин одам ҳибсга олинган, 100 та банк ва 57 та катта дўкон ёқиб юборилган. Вилоятларнинг биридаги дўкон талон-тарож қилинган.