Iroqdagi norozilik namoyishlarida neft terminallari va konlariga olib boruvchi yo‘llar ham yopib qo‘yildi

Iroqdagi norozilik namoyishlarida ishtirok etayotgan fuqarolar mamlakatning bir nechta neft ishlab chiqaruvchi korxona va terminallaridagi ishni to‘xtatishga urinmoqda. Ushbu harakat oqibatida Iroqning neft eksportiga zarar yetishi mumkin. Bu haqda “TASS” xabar bergan.

Xabarga ko‘ra, hukumatdagi korrupsiya, xalqning qashshoqligi va turmush sharoitining og‘irligi tufayli norozilik bildirayotgan namoyishchilar Iroq janubida joylashgan Umm-Qasr portiga olib boruvchi yo‘lni yopib qo‘ygan.

Az-Zubayrdagi Iroq neft ishlab chiqarish kompaniyasi vakilining aytishicha, Umm-Qasr porti orqali neft eksportinin amalga oshirish imkonsiz. Basra dengiz orqali savdoni amalga oshirishning yagona yo‘nalishi bo‘lib qolgan. Uning so‘zlariga ko‘ra norozilik bildirayotgan olomon hatto neft zavodi xodimlarini ham Umm-Qasr portiga o‘tkazmayapti.

Al-Arabiya telekanalining ma’lum qilishicha, namoyish o‘tkazayotgan fuqarolar 18-noyabrdan beri Az-Zubayra neft koniga olib boruvchi yo‘llarni ham yopib qo‘ygan.

Basra orqali Xitoy xalq respublikasi, Yaponiya va O‘rtayer dengizi atrofidagi davlatlarga neft eksport qilish davom etmoqda va bu kabi muammolarga uchramagan.

Al-Arabiya telekanali neft eksportiga bunday yo‘l bilan halaqit qilishga urinishlarning asosiy sababi Iroq neftining Hindiston tomonidan xarid qilinishi boshlangani bo‘lishi mumkinligini qayd etgan.

Iroqda 25-oktabrda hukumatga qarshi norozilik namoyishlarining ikkinchi to‘lqini boshlangan. Mamlakat aholisi hukumat siyosatidan norozi bo‘lib, Bag‘dod, Ad-Devoniya va An-Nasriya shaharlarida namoyish o‘tkazishni boshlagan. Ular korrupsiyaning avj olgani, ish o‘rinlarining yetarli emasligi va davlat tomonidan ijtimoiy himoyaning ta’minlanish darajasining pastligi tufayli norozilik bildirmoqda.

Iroqdagi hukumatga qarshi namoyishlar 1-oktabrda boshlangan. 2-oktabrda Iroq hududining 75 foiz qismida internet o‘chirib qo‘yilgan va 11-oktabrda qayta ishga tushirilgandi. Iroqdagi namoyishlarning birinchi bosqichida kuchishlatar tizim hamda xalq o‘rtasidagi to‘qnashuvlar natijasida 157 nafar odam: 149 nafar fuqaro va 8 nafar xavfsizlik xizmati xodimlari halok bo‘lgan, qariyb 3,5 ming odam turli darajadagi tan jarohatlari olgan.

Ma’lum vaqt tanaffusdan so‘ng yana qayta boshlangan noroziliklarda politsiya hamda xalq o‘rtasida kuchli to‘qnashuvlar kuzatilmoqda. Namoyishchilar viloyatlardagi siyosiy partiyalar ofislari, mahalliy hokimliklar va diplomatik vakolatxonalar binolarini yoqishga uringani va ularning ayrimlariga o‘t qo‘ygani, Iroqdagi namoyishlarda halok bo‘lganlar soni 250 nafardan oshgani xabar qilingan. Al-Sumaria telekanali ma’lumotiga ko‘ra internetni o‘chirib qo‘yish Iroq hukumatiga 1 milliard AQSh dollariga tushgan.

Iroqda 1-oktabrda boshlangan va hali ham davom etayotgan namoyishlarda kamida 320 nafar odam halok bo‘lgan va minglab odamlar turli tan jarohatlari olgan.