Turkiya hukumati vakillari Rossiyaning Anqaradagi favqulodda va muxtor elchisiga Suriya shimoli-sharqidagi “Tinchlik bulog‘i” harbiy operatsiyasini qayta boshlash rejalashtirilmaganligini ma’lum qilgan. Bu haqda Rossiya tashqi ishlar vaziri Sergey Lavrovning so‘zlariga tayanib “Izvestiya” xabar berdi.
“Rossiyaning elchisiga anglashilmovchilik bo‘lgani va Anqarada hech kim Turkiya tashqi ishlar vaziri Mavlut Chavusho‘g‘lu ham, prezidentning rasmiy vakili Ibrohim Kalin ham Rossiya amalga oshirayotgan ishlardan shubhaga bormagan va “Tinchlik bulog‘i” operatsiyasini qayta boshlashni nazarda tutib gapirmagan”, — deydi Lavrov.
Mavzuga doir: Erdo‘g‘on Tramp bilan AQSh Suriya bo‘yicha kelishuvda bajarmagan majburiyatlarni muhokama qiladi
“Tinchlik bulog‘i” operatsiyasi haqida
9-oktabrda Anqara Suriya shimoli-sharqida Turkiyadagi qochoqlar uchun xavfsiz zona tashkil etish maqsadida “Suriya demokratik kuchlari” kurd jangarilari va IShID terrorchilariga qarshi “Tinchlik bulog‘i” harbiy operatsiyasini boshlagan. Dunyo davlatlari turklarning ushbu harakatlarini qoralagan. AQSh Turkiyaga qarshi sanksiyalar qo‘lladi.
17-oktabrda Anqara va Vashington Suriya shimoli-sharqidagi operatsiyani 120 soatga, kurdlar xavfsiz zona hududidan chiqib ketishi uchun to‘xtatishni kelishib oldi va sanksiyalar bekor qilindi.
22-oktabrda Sochida Rossiya prezidenti Vladimir Putin va Turkiya davlat rahbari Rajab Toyyib Erdo‘g‘on Suriya hududidagi notinch vaziyatni muhokama qildi va “Tinchlik bulog‘i” operatsiyasini 23-oktabrdan yana 150 soatga to‘xtatish va o‘t ochmaslik haqidagi shartlashuv muddati yakuniga yetgach hamkorlikda Turkiya—Suriya chegarasida 30 kilometrlik hududni barpo etish uchun qo‘shma patrul tadbirlari o‘tkazish haqida memorandum imzoladi.
1-noyabrda kurdlarning Turkiya chegarasidan 30 kilometr uzoqlikka chekingani va ular tark etgan hududni Sochida imzolangan memorandumga muvofiq Suriya qo‘shinlari va Rossiya harbiy politsiyasi egallashi ma’lum bo‘ldi. 5-noyabrda Turkiya hamda Rossiya harbiylari Suriya shimolidagi Ayn-al-Arab aholi punktidagi (Kobani) ikkinchi qo‘shma patrul tadbirlarini boshladi. 10-noyabrda Turkiya prezidenti Rajab Toyyib Erdo‘g‘on hamda Rossiya prezidenti Vladimir Putin telefon orqali suhbat qilib, Suriyadagi nizolarni hal etish borasida o‘zaro fikr almashgan. Rossiya Turkiya kelishuviga muvofiq ikki davlat harbiylari Suriya shimoli-sharqida jami 8 ta qo‘shma patrul tadbirlari o‘tkazgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)