Iroqda Eron konsulligiga uyushtirilgan hujum natijasida besh nafar odam halok bo‘ldi

Iroqning Karbalo shahridagi norozilik namoyishlari vaqtida Eron konsulligiga hujum uyushtirilgan, deb yozmoqda “RIA Novosti”.

Karbalodagi namoyishlar va Eron konsulligiga hujum vaqtida besh nafar odam halok bo‘lgan va bir necha Iroq fuqarolari jarohatlangan.

Biroq Inson huquqlari bo‘yicha Iroq oliy komissiyasi ma’lumotiga ko‘ra, politsiya namoyishchilarni tarqatishga uringan vaqtda Karbaloda uch nafar odam qurbon bo‘lgan.

Eron konsulligining eshiklari yoqib yuborilgani va diplomatik missiyani qo‘riqlayotgan xavfsizlik xodimlari namoyishchilarga qarata o‘t ochgan. Noroziliklar ishtirokchilari konsullikdagi Eron bayrog‘ini Iroqnikiga almashtirib qo‘ygan.

Namoyishlar o‘tayotgan Iroq viloyatlari va shaharlarida 4-noyabr, dushanba kuni mamlakat miqyosida qo‘zg‘alon ko‘tarilishi e’lon qilingan. Asosiy avtotrassalar yopib qo‘yilgan.Iroqdagi hukumatga qarshi namoyishlar 1-oktabrda boshlangan. Ma’lum vaqt tanaffusdan so‘ng yana qayta boshlangan noroziliklarda politsiya hamda xalq o‘rtasida kuchli to‘qnashuvlar kuzatilmoqda. Namoyishchilar viloyatlardagi siyosiy partiyalar ofislari, mahalliy hokimliklar va diplomatik vakolatxonalar binolarini yoqishga uringani va ularning ayrimlariga o‘t qo‘ygani, Iroqdagi namoyishlarda halok bo‘lganlar soni 250 nafardan oshgani xabar qilingan.