Бу ҳафтада ўзбек матбуотида ўта шов-шувли ва мунозарали воқеалар учрамади. Амалдорлар қовун туширмади. Асли парадоксал воқеа ва салбий хабарларни тарқатишни биз ҳам истамаймиз. Шу боис халқимиз ҳаётига оид муҳим янгиликларни ҳавола қиламиз. Марҳамат.
Халқ таълими вазири Шерзод Шерматов нофаол мактабларга чақириқ ташлади.
«Битирувчиларининг бирортаси ҳам ОТМга ўқишга кирмаган мактаблар биринчи бўлиб аттестация ва аккредитациядан ўтади», деди вазир. Сурхондарё вилояти Жарқўрғон туманида мактаблар ҳақида гапираркан, «биронта ҳам битирувчиси ОТМга кирмаган мактабларнинг раҳбарияти ва педагогик жамоаси эса ўз виждонлари олдида ўзларига савол беришлари керак – қанчалик уларга юклатилган вазифаларни инсоф билан бажараётганлари ҳақида. Тумандаги аҳвол, болаларнинг оилавий шароити, умумий республикадаги бошқа муаммолар юқоридаги мактабларга деярли бир хил таъсир кўрсатади, аммо биттаси шундай яхши натижа кўрсатмоқда, саккизтаси эса умуман натижа кўрсатмаган», деди Шерматов.
Статистикага кўра, республиканинг бошқа ҳудудларидан битирувчиларининг барчаси (100 фоиз) ОТМга кирган мактаблар ҳам талайгина, лекин биронта битирувчиси ОТМга кирмаганлари ундан анча кўп.
Шундай қилиб, биттаям битирувчиси ОТМга кирмаган мактаб ўқитувчилари бу йил анча терлайдиган кўринади. Ўз ўрнида Шерзод Шерматов яхши натижа кўрсатган мактаблар қандай қилиб бунга эришганини санаб ўтган.
* * *
Марҳаматда Ўзбекистон халқ шоири Муҳаммад Юсуфга уй-музей қуриш учун ажратилган ер тадбиркорга бериб юборилибди. Бундан, табиийки, шоирнинг оиласи ранжиган. Хўш, асли нима бўлганди? «Kun.uz» журналистлари воқеани аниқлаштирган.
Уч йил аввал Марҳаматнинг аввалги ҳокими марҳум шоирнинг аёлига туманда шоир хотирасига уй-музей қуришни таклиф қилади ва ер ажратади. Уй-музей халқ ҳашари билан қурилиши айтилади. 2016 йилда туман ҳокимининг қарори чиқади. Аммо 2019 йилда ушбу қарор бекор қилинмасдан айни ўша ер майдонини тадбиркорга бизнес қилиш учун бериш ҳақида иккинчи қарор чиқади. Журналист тадбиркор билан учрашганда у шоирнинг оиласига бир оз пул берганлигини айтган. Шоирнинг оиласи буни рад қилмаган, аммо пул унда турганини, ерни қайтаришса, пулни ҳам дарҳол қайтаришини маълум қилган. Асли уй-музей қурилишига ҳокимлик ҳам тенгдан масъул эди, бироқ ерни шоир оиласига қарор чиқартирган ҳоким аллақачон ишдан кетиб ўрнига янгиси бўлган. Дарвоқе, тадбиркор ушбу ерда уч йил давомида қурилиш амалга ошмаганлиги учун иш бошлаганини айтган, шунингдек, бинода шоир хотираси учун алоҳида зал ажратиб ҳайкал қўйилиши, экспонатлар учун шароит қилиб берилишини билдирган.
Бу чалкашликлар нафақат шоир хотирасига бефарқликни, шу билан бирга мамлакатимизда ер ажратиш, ҳокимлик қарорлари ва кадастр ишлари ҳамон ўлда-жўлда ётганлигидан далолат беради.
* * *
Партиялар сайловда ғолиб бўлса, бош вазирликка кимни тавсия қилишини билдирди. Адолат СДП ғолиб бўлса, адлия вазири Русланбек Давлетовни бош вазирликка тавсия қилади. Борди-ю, Халқ демократик партияси ғалаба қозонса, унда бош вазирнинг биринчи ўринбосари Очилбой Раматов номзоди илгари сурилади. Либерал-демократларимиз амалдаги бош вазир Абдулла Ариповнинг ўзини ёқлайди. Миллий тикланиш партияси эса эҳтиёткорликни намойиш қилиб, номзодини сир сақлади. Дарвоқе, сиёсатда дастлабки қадамларини ташлаётган экологлар партияси «Ўзкимёсаноат» АЖ раиси Одил Темировни бош вазир сифатида кўриш истагини билдирди.
Бу сиёсий воқеа шуниси билан муҳимки, илгари партиялар ғолиб бўлса, бош вазирликка кимни тавсия қилиши айтилмас, фуқаролар ҳам бу билан қизиқмасди.
Конституциямизга асосан, сиёсий партия бош вазир номзодини президентга таклиф қилади ва уни президент кўриб чиқиб, тасдиқлаши учун Олий Мажлис палаталарига киритади.
* * *
Шаҳрисабз тумани ҳокимининг ўринбосари пора билан қўлга тушди. У ерга эгалик қилиш ҳуқуқини олиб бериш учун пул олаётганда процессуал тартибда ушланган ва жиноий иш қўзғатилган. Ҳокимият мансабдорларининг пора олиши табиий ҳол, бўлса нега бу қадар типик ҳолатни дайжестимизга олиб чиқдик? Гап шундаки, пора миқдори жуда катта ёки жуда кичкина бўлса, диққатга сазовор бўлиб, у жойлардаги ноқонуний олди-бердилар ҳажми бўйича маълумот беради. Шаҳрисабз тумани «замҳокими» юз минглаб доллар билан эмас, атиги юз доллар билан қўлга тушган.
* * *
Энди осонликча дарахт кесилишига чек қўйилди. Ўзбекистон президентининг фармони чиқди, унда Давлат экология қўмитаси, Ўзбекистон экологик партияси ва жамоатчиликнинг давлат ўрмон фондига кирмайдиган дарахтлар ва буталар қимматбаҳо навларининг кесилишига мораторий жорий этиш тўғрисидаги таклифи маъқулланган.
Мораторий 2019 йил 1 ноябрдан 2020 йил 31 декабргача амал қилади. Амал қилиш даврида ваколатли давлат органларига давлат ўрмон фондига кирмайдиган дарахтлар ва буталар қимматбаҳо навларининг кесилишига рухсатнома бериш ман этилади. Аммо фармонда «баъзи ҳолатлар мустасно эканлиги» белгилаб қўйилган.
* * *
Тошкентда Шанхай ҳамкорлик ташкилоти ҳукумат раҳбарлари кенгаши йиғилиши ўтказилди. Унда Россия, Қозоғистон, Тожикистон, Қирғизистон ва бошқа давлатлар бош вазирлари иштирок этди. Бу йирик тадбирга Шанхай ҳамкорлик ташкилоти ҳузуридаги кузатувчи давлатлар – Афғонистон, Беларусь, Мўғулистон ва Эрон ҳукуматлари раҳбарлари ҳам таклиф этилган эди. ШҲТ ҳукумат раҳбарлари кенгаши мажлиси давомида 14 та ҳужжат имзоланди, ушбу ҳужжатлардан 12 тасини бевосита бош вазирлар тасдиқлади.
Эслатиб ўтамиз, ШҲТ дунё аҳолисининг деярли ярми яшовчи давлатларни ўзида жамлаган ташкилот. Евросиё ҳудудининг 60 фоизини эгаллаган ШҲТ давлатларининг дунё ЯИМдаги улуши 30 фоиздан ортиқроқ. Гарчи қамрови жуда кенг бўлса-да, бу ташкилот ҳарбий блок ҳисобланмайди ва милитаристик режалар тузмайди.
«Дарё» янгиликларини кузатиб боринг. Ўзбекистон ва дунё хабарларидан энг биринчи воқиф бўлинг.
Изоҳ (0)