O‘rganishlarga ko‘ra, “O‘zto‘qimachiliksanoat” uyushmasi, “O‘zpaxtasanoat” AJning hududlardagi 70 tikuv-trikotaj mahsulotlari ishlab chiqarishga ixtisoslashtirilgan korxonasida 5055 ta, milliy vakansiyalar bazasida esa tikuvchi-bichuvchi kasb lavozimiga 14 mingga yaqin bo‘sh ish o‘rni mavjud, deb xabar berdi O‘zA.
O‘zbekiston Respublikasi Bandlik va mehnat munosabatlari vazirligi mas’ul tashkilotlar bilan hamkorlikda 20 mingga yaqin ana shu o‘rinlariga ishsiz xotin-qizlarni joylashtirishga kirishdi, deyiladi xabarda.
Jumladan, Qashqadaryo viloyatining Kitob tumanidagi “Sharq yulduzi“ hamda “Bahor“ MFYda yashovchi 112 ishsiz ayol o‘z hududida joylashgan 200 dan ortiq ish o‘rniga ega bo‘lgan “Qarshi Barokat” MChJ tikuv-trikotaj fabrikasida bo‘ldi.
Tashrif chog‘ida korxonada yaratilgan sharoitlar bilan yaqindan tanishildi va ish beruvchilar bilan suhbatlashildi. Natijada 30 xotin-qiz fabrikada faoliyat ko‘rsatish istagini bildirdi. Shu yerning o‘zida ulardan ishga joylashish uchun ariza qabul qilindi.
Mana shunday tadbirlarning navbatdagisi Toshkent viloyatida o‘tkazildi. Hududning Qibray, Yuqori Chirchiq, Chinoz tumanlari hamda Chirchiq shahrida istiqomat qiluvchi 160 dan ortiq xotin-qiz o‘z hududidagi tikuv-trikotaj korxonalarida bo‘ldi.
Ma’lumotlarga ko‘ra, ushbu korxonalarda 150 bo‘sh ish o‘rni mavjud. Tadbir natijasida 40 ga yaqin xotin-qiz tekstil yo‘nalishida faoliyat ko‘rsatish istagini bildirib, ishga joylashish uchun ariza yozdi.
Qayd etilishicha, ishsiz xotin-qizlarni tikuv-trikotaj korxonalari bilan tanishtirish asosida ularni ishga joylashtirish tadbiri joriy yilning 1-dekabrigacha davom etadi.
Izoh (0)