Toshkent tumanida birgina elektr energiyasi bo‘yicha 671 million so‘mdan ortiq noreal qarzdorlik aniqlandi. Bu haqda “Daryo”ga MIB matbuot xizmati xabar berdi.
Ma’lum bo‘lishicha, 2019-yilning 10 oyi davomida energiya resurslari bo‘yicha noreal qarzdorliklarni aniqlash bo‘yicha bir qancha ishlar amalga oshirilgan.
Birgina elektr energiyasi bo‘yicha 199 nafar iste’molchida 671 million 408 ming 158 so‘m noreal qarzdorlik aniqlanib, byuro tomonidan iste’molchilarga asossiz qo‘yilgan qarzlarning dasturdan yechilishiga amaliy yordam ko‘rsatilmoqda.
Xususan, ta’minotchi korxona tomonidan taqdim etilgan qarzdorlar ro‘yxatiga Toshkent tumani “Qashqarlik” MFY, Chimkent ko‘chasida yashovchi iste’molchi U.K. xonadoni kiritilgan bo‘lib, uning elektr energiyasidan 8 million 848 ming so‘m qarzi mavjudligi ko‘rsatilgan.
Davlat inspektori tomonidan ushbu manzilga chiqilganda, iste’molchi xonadoni elektr energiyasidan shaxsiy hisob raqamida 8 million 808 ming 990 so‘m noreal qarzdorlik mavjudligi, foydalanilgan elektr energiyasi uchun haqiqiy qarzorlik esa 39 ming 500 so‘m ekanligi aniqlangan.
Joyning o‘zida iste’molchining elektr energiyasidan qarzdorlik-haqdorligini hatlovdan o‘tkazilgani bo‘yicha dalolatnoma rasmiylashtirilib, xonadonning qarzdorlik dasturidan chiqarish choralari ko‘rilgan.
Izoh (0)