Тошкент туманида биргина электр энергияси бўйича 671 миллион сўмдан ортиқ нореал қарздорлик аниқланди. Бу ҳақда «Дарё»га МИБ матбуот хизмати хабар берди.
Маълум бўлишича, 2019 йилнинг 10 ойи давомида энергия ресурслари бўйича нореал қарздорликларни аниқлаш бўйича бир қанча ишлар амалга оширилган.
Биргина электр энергияси бўйича 199 нафар истеъмолчида 671 миллион 408 минг 158 сўм нореал қарздорлик аниқланиб, бюро томонидан истеъмолчиларга асоссиз қўйилган қарзларнинг дастурдан ечилишига амалий ёрдам кўрсатилмоқда.
Хусусан, таъминотчи корхона томонидан тақдим этилган қарздорлар рўйхатига Тошкент тумани «Қашқарлик» МФЙ, Чимкент кўчасида яшовчи истеъмолчи У.К. хонадони киритилган бўлиб, унинг электр энергиясидан 8 миллион 848 минг сўм қарзи мавжудлиги кўрсатилган.
Давлат инспектори томонидан ушбу манзилга чиқилганда, истеъмолчи хонадони электр энергиясидан шахсий ҳисоб рақамида 8 миллион 808 минг 990 сўм нореал қарздорлик мавжудлиги, фойдаланилган электр энергияси учун ҳақиқий қарзорлик эса 39 минг 500 сўм эканлиги аниқланган.
Жойнинг ўзида истеъмолчининг электр энергиясидан қарздорлик-ҳақдорлигини ҳатловдан ўтказилгани бўйича далолатнома расмийлаштирилиб, хонадоннинг қарздорлик дастуридан чиқариш чоралари кўрилган.
Изоҳ (0)