O‘zbekiston Respublikasi Prezidenti Shavkat Mirziyoyev 1-noyabr, juma kuni mamlakatga rasmiy tashrif bilan, shuningdek, Shanxay hamkorlik tashkilotiga a’zo davlatlar Hukumat rahbarlari kengashining 18-majlisida ishtirok etish uchun kelgan Xitoy Xalq Respublikasi Davlat kengashi bosh vaziri Li Ketsyanni qabul qildi. Bu haqda Prezident matbuot xizmati xabar berdi.
Davlat rahbari mehmonni samimiy qutlab, O‘zbekiston bilan Xitoy o‘rtasidagi do‘stlik va har tomonlama strategik sheriklik munosabatlari izchil mustahkamlanib borayotganiga katta mamnuniyat bildirdi.
Li Ketsyan, o‘z navbatida, O‘zbekiston Prezidentiga iliq mehmondo‘stlik uchun samimiy minnatdorlik bildirdi hamda XXR raisi Si Szinpinning salomi va eng ezgu tilaklarini yetkazdi.
Uchrashuvda ikki davlat rahbarlarining samarali muzokaralari konstruktiv siyosiy muloqotni kengaytirish va barcha sohalarda ko‘p qirrali amaliy hamkorlikni rivojlantirish uchun mustahkam zamin yaratgani alohida ta’kidlandi.
Oliy darajada erishilgan kelishuvlar va imzolangan bitimlarni so‘zsiz amalga oshirish, ikki tomonlama savdoning jadal o‘sishini ta’minlash, shuningdek, infratuzilmani rivojlantirish, energetika, sanoat, qishloq xo‘jaligi, transport, axborot-telekommunikatsiya texnologiyalari va boshqa sohalarda ustuvor loyihalarni birgalikda ilgari surish zarurligi qayd etildi.
Madaniy-gumanitar yo‘nalishda, avvalo fan, ta’lim, innovatsiyalar va turizm yo‘nalishlaridagi aloqalarni mustahkamlashga alohida e’tibor qaratildi.
Uchrashuvda Shanxay hamkorlik tashkiloti doirasidagi hamkorlikni kengaytirish masalalari muhokama qilindi. Xususan, iqtisodiyot, investitsiyalar va transport kommunikatsiyalari sohalarida tashkilotga a’zo barcha davlatlar uchun manfaatli bo‘lgan yirik loyihalarni amalga oshirish dolzarb ekani ta’kidlandi.
Xalqaro va mintaqaviy ahamiyatga molik masalalar yuzasidan ham fikr almashildi.
XXR Davlat kengashi bosh vaziri Xitoy ikki mamlakat va xalq manfaatlari yo‘lida ko‘p qirrali sheriklik munosabatlarini yanada rivojlantirish va mustahkamlashga ko‘maklashishga tayyor ekanini tasdiqladi.
Shu kunning o‘zida Shavkat Mirziyoyev ShHTga a’zo davlatlar Hukumatlar rahbarlari kengashi majlisida ishtirok etish uchun mamlakatda amaliy tashrif bilan bo‘lib turgan Turkmaniston Vazirlar Mahkamasi raisining o‘rinbosari, tashqi ishlar vaziri Rashid Meredovni qabul qildi.
Davlat rahbari mehmonni samimiy qutlar ekan, oliy darajada ochiq hamda ishonchga asoslangan muloqot yo‘lga qo‘yilgani va bu O‘zbekiston—Turkmaniston strategik sheriklik munosabatlarini yangi darajaga ko‘targanini katta mamnuniyat bilan qayd etdi.
Rashid Meredov O‘zbekiston Respublikasi Prezidentiga samimiy qabul uchun minnatdorlik bildirdi hamda Turkmaniston Prezidenti Gurbanguli Berdimuhamedovning salomi va eng ezgu tilaklarini yetkazdi.
Uchrashuvda savdo-iqtisodiy, transport-kommunikatsiya, energetika, qishloq xo‘jaligi va iqtisodiyotning boshqa tarmoqlarida o‘zaro manfaatli hamkorlikni mustahkamlash uchun katta salohiyat mavjudligi qayd etildi.Hududlararo aloqalar va madaniy-gumanitar almashinuvni kengaytirish muhim ekani ta’kidlandi.
Shuningdek, mintaqaviy ahamiyatga molik masalalar, jumladan, kelgusida ikki va ko‘p tomonlama formatda o‘tadigan oliy darajadagi tadbirlarni inobatga olgan holda ko‘rib chiqildi.
Izoh (0)