Yunusobod tumanida noturar joyga soliq solish bo‘yicha tajriba o‘tkaziladi

Poytaxtning Yunusobod tumanida O‘zbekistonda ko‘chmas mulkka soliq solishni takomillashtirish konsepsiyasiga muvofiq noturar joy mulkiga soliq solish bo‘yicha sinov loyihasi amalga oshiriladi. Bu haqda Davlat soliq qo‘mitasi matbuot xizmati xabar berdi.

Bu kabi qaror Yunusobod tumani hokimi, tuman soliq inspeksiya boshlig‘i, IIB boshlig‘ining Rossiya delegatsiyasi Federal soliq xizmati vakillari bilan bo‘lib o‘tgan uchrashuvi yakunida qabul qilindi.

Konsepsiya Rossiyaning O‘zbekistonga texnik yordam ko‘rsatish to‘g‘risidagi bitimi doirasida yaratilmoqda.

“Barcha sohalarda sodir bo‘layotgan o‘zgarishlarning yuqori intensivligini hisobga oladigan bo‘lsak, O‘zbekistonda mulkni soliqqa tortish tizimini qayta ko‘rib chiqish — o‘z vaqtida ko‘rilgan chora hisoblanadi”, — deydi iqtisodiy fanlar doktori, professor Nikolay Volovich.

Uning so‘zlariga ko‘ra, hozirda kadastr qiymati va ko‘chmas mulk uchun solinadigan soliq bazasi uning bozor qiymatidan ancha farq qiladi, ammo ko‘chmas mulk solig‘i — ma’lum darajada farovonlik solig‘i hisoblanadi.

Shu sababli, konsepsiyada mulkni baholashda chiqim va qiyosiy yondashishdan tashqari, daromad tahlili ham taklif etiladi.