Surxondaryoda “Bolaliktepa” yodgorligiga olib boruvchi yo‘l yopilgan. Muhofaza hududi ekin maydoniga aylantirilib, molxona ham qurib olingan

Surxondaryo viloyatining Angor tumanidagi jahonga mashhur “Bolaliktepa” arxeologiya yodgorligi qarovsiz qolib kelmoqda. Bu haqda “Daryo”ga jurnalist Nargiza Rahmatullayeva ma’lum qildi.

Yodgorlikning atrofidagi muhofaza hududi mahalliy aholi tomonidan o‘zboshimchalik o‘zlashtirilib, ekin maydoniga aylantirilgan, hatto molxona ham qurib olingan. Achinarlisi, dunyo olimlarini o‘ziga ohangraboday tortib kelayotgan ushbu yodgorlikka boruvchi yo‘lning o‘zi yo‘q. Buni mutasaddilar ham tasdiqladi.

— Ushbu yodgorlik qadimdan borligini bilamiz, lekin uning tarixi haqida ma’lumotga ega emasmiz, —deydi “Dehqonittifoq” MFY raisi Shuhrat Hidirov. — “Bolaliktepa” atrofini 9 ta xo‘jalik o‘rab olgan, unga olib boruvchi yo‘l yo‘q.

Mahallada yashovchi fuqarolardan ushbu arxeologik yodgorlik haqida so‘raganimizda ular ham uning tarixidan xabardor emasliklarini bildirishdi.

— Arxeologik tadqiqotlar natijasida “Bolaliktepa” ko‘shki markaziy qismidan antiqa devoriy suratlar topilgan,—deydi arxeolog To‘xtash Annayev. — Ushbu suratlar zalning supa sathidan boshlab to‘rt tarafini bezab turganligi aniqlangan. Ularda 5—7-asrlarda zodagonlar va katta yer egalari qarorgohida bo‘lib o‘tadigan bazm jarayoni tasvirlangan bo‘lib, jami 47 nafar shaxs aks ettirilgan.

Surxondaryo viloyat madaniy meros boshqarmasi boshlig‘i Shohista Mamatqulovaga ko‘ra, ayni paytda viloyatdagi moddiy va arxeologik meros obyektlaridan 69 tasi sayyohlik yo‘nalishlariga kiritilgan, ular orasida “Bolaliktepa” ham bor. Ushbu yodgorlik atrofidagi muhofaza hududi fuqarolar tomonidan turli maqsadda foydalananilyotganligi aniqlanib, mahalliy aholi ogohlantirilgan, lekin vaziyat o‘zgargani yo‘q. Tuman hokimligi yodgorlikka olib boruvchi yo‘lni ochib bersa, sayyohlarning ushbu obyektga kirib-chiqishida noqulayliklarning oldi olingan bo‘lar edi.

— Angor tumanidagi mashhur arxeologik yodgorliklarning aksariyati qarovsiz. Mahalliy aholi o‘zboshimchalik bilan foydalanib kelmoqda. Masalan, “Zartepa”ning ichki qismi aholi tomonidan ekin maydoniga aylantirgan bo‘lsa, “Kuyovqo‘rg‘on” qo‘yxona qilib olingan, — deydi arxeolog To‘xtash Annayev.

Ma’lumotlarga ko‘ra, hozirda viloyatda jami 561 ta moddiy va arxeologik meros ob’ekti bor, ulardan 440 tasi arxeologiya, 40 tasi arxitektur yodgorliklari hisoblanadi.

Savol tug‘iladi: ularning yana qanchasi “Bolaliktepa” kabi qarovsiz holga kelgan?