Пойтахтнинг Юнусобод туманида Ўзбекистонда кўчмас мулкка солиқ солишни такомиллаштириш концепциясига мувофиқ нотурар жой мулкига солиқ солиш бўйича синов лойиҳаси амалга оширилади. Бу ҳақда Давлат солиқ қўмитаси матбуот хизмати хабар берди.
Бу каби қарор Юнусобод тумани ҳокими, туман солиқ инспекция бошлиғи, ИИБ бошлиғининг Россия делегацияси Федерал солиқ хизмати вакиллари билан бўлиб ўтган учрашуви якунида қабул қилинди.
Концепция Россиянинг Ўзбекистонга техник ёрдам кўрсатиш тўғрисидаги битими доирасида яратилмоқда.
«Барча соҳаларда содир бўлаётган ўзгаришларнинг юқори интенсивлигини ҳисобга оладиган бўлсак, Ўзбекистонда мулкни солиққа тортиш тизимини қайта кўриб чиқиш — ўз вақтида кўрилган чора ҳисобланади», — дейди иқтисодий фанлар доктори, профессор Николай Волович.
Унинг сўзларига кўра, ҳозирда кадастр қиймати ва кўчмас мулк учун солинадиган солиқ базаси унинг бозор қийматидан анча фарқ қилади, аммо кўчмас мулк солиғи — маълум даражада фаровонлик солиғи ҳисобланади.
Шу сабабли, концепцияда мулкни баҳолашда чиқим ва қиёсий ёндашишдан ташқари, даромад таҳлили ҳам таклиф этилади.
Изоҳ (0)