Toshkent shahar IIBB itni yoqib yuborgan shaxslarni qidirmoqda

Toshkent shahar IIBB itning ustiga benzin sepib, yoqib yuborgan fuqarolarning shaxsni aniqlash bilan shug‘ullanmoqda. Bu boradagi video ijtimoiy tarmoqlarda tarqalgan, deb xabar beradi Facebook’dagi “IIBB: Xalq bilan muloqot (Toshkent)” guruhida.

“Bizga yordamingiz zarur. Mazkur videoning birinchi manbasi — qayerda olingani yoki videodagi odamlar haqida ma’lumot bo‘lsa, iltimos bizga xabar bering”, — deyiladi IIBB murojaatida.

So‘nggi vaqtlarda hayvonlarni qiynashga oid videolar internetda keng tarqalmoqda.

Iyun oyida Toshkentdagi erkak kuchugini otgani tasvirlangan video paydo bo‘lgandi. Keyinroq ma’lum bo‘lishicha, itning egasi tanishiga murojaat qilib, uni otib tashlashni so‘ragan. Bunga it qarindoshlaridan birini tishlab olgani sabab bo‘lgan. Sud ushbu holatga aloqador to‘rt kishiga jarima belgilagan edi.

Iyul oyida Toshkent shahar hokimligi qoshidagi qutqaruv xizmati xodimlari bir itni bo‘ri deb o‘ylab kaltaklagani tasvirlangan video tarqalgan edi. Hayvon halok bo‘lgan. Ma’muriy ishlar bo‘yicha Yashnobod tumani sudi xodimlarni aybdor deb topgan va jarima belgilagan.

Samarqandda avgust oyida Spark va Nexia avtomobili haydovchilari ataydan itning ustiga mashina haydagani, yana bir videoda PPX xodimi itga g‘isht otgani tasvirlangan edi. Samarqand huquq-tartibot idoralari ushbu voqeani inobatga olmagan, ish sudgacha yetib bormasdan tugatilgan.

“Gazeta.uz”ning yozishicha, bu ma’lum bo‘lgan holatlarning bir nechtasi, xolos. “Mehr va oqibat” hayvonlar himoyasi jamiyati hamda Toshkent shahar IIBB hamkorligida hayvonlarga nisbatan shafqatsiz munosabatda bo‘lgan odamlar aniqlanib, javobgarlikka tortilmoqda. Biroq hayvonlarga nisbatan zo‘ravonlik qilish uchun jazo kuchsizligicha qolmoqda va tez-tez suiiste’mol qilinadigan holatlarda bu o‘z samarasini bermayapti.

Qiynoq va hayvonlarning o‘limi yoki jarohatlanishiga olib keladigan harakatlar uchun ma’muriy javobgarlik belgilangan, jarima bazaviy hisoblash miqdorining  1—3 barobarigacha, takroriy qonunbuzarliklar uchun 3—5 barobarida jarima solinadi yoki 15 kungacha ma’muriy qamoq jazosi belgilanadi.

Hayvonni qiynash, shikast yetkazish yoki uni o‘ldirish uchun jarimani bazaviy hisoblash miqdorining 10—15 barobari, qayta takrorlansa, 15—30 barobari miqdorida yoki 15 sutka ma’muriy qamoq jazosini belgilash taklif qilinmoqda. Ushbu shakldagi qonun loyihasi birinchi o‘qishda qabul qilindi, ammo ikkinchi o‘qishda katta jarimalar ko‘pchilik deputatlar tomonidan ma’qullanmagan.