Iroq poytaxti Bag‘dod va mamlakat janubidagi boshqa shaharlarda talabalarning norozilik namoyishlari bo‘lib o‘tmoqda. Bu haqda “TASS” xabar berdi.
Talabalar yoshlar o‘rtasidagi ishsizlik ko‘rsatkichining yuqoriligi va aholi turmush sharoitining og‘irlashgani, hukumat tuzilmalarida korrupsiya kuchayib ketgani sababli Basra, An-Najafa, Amar, Ad-Devoniya va Maysan shaharlarida namoyishlar o‘tkazmoqda. Iroq o‘qituvchilarining kasaba uyushmalari ham Janub talabalarining harakatini qo‘llab-quvvatlagan holda o‘z hududlaridagi norozilik tadbirlarida ishtirok etishni boshlagan.
Ma’lumotlarga ko‘ra, o‘qituvchilar ishtirokidagi noroziliklar mamlakat maktablarida har kuni darslar o‘tiladigan vaqtlarda bo‘lib o‘tmoqda.
Bag‘doddagi qo‘zg‘alonlarga maktab o‘quvchilari hamda oliy ta’lim muassasalarining talabalari ham qo‘shildi va ular Tahrir maydonidagi mamlakatda tezkor ravishda islohotlar o‘tkazilishi hamda yosh mutaxassislarga munosib sharoitlar yaratilishini talab qilayotganlarni qo‘llab-quvvatlamoqda.
Iroq maorif vaziri Soha al-Ali Bek katta sinfda o‘qiydiganlarning noroziliklarda qatnashmasligi lozimligi, maktab rahbariyati va o‘qituvchilar kengashi o‘quvchilarning hayoti hamda xavfsizligiga javobgarligini bildirgan. Bag‘doddagi operatsiyani boshqarayotgan kuchishlatar tizim vakillari ham maktab o‘quvchilarining ushbu harakatlardagi ishtirokiga qarshi ekanligini ma’lum qilgan.
Hukumatning ogohlantirishiga qaramay talabalar xalqning norozilik namoyishlari ishtirokchilariga aylandi. Politsiyachilarning qo‘zg‘alonchilarga qarshi shovqin chiqaruvchi granatalar ishlatganligi haqida xabarlar tarqalgan.
Inson huquqlari bo‘yicha Iroq oliy komissiyasi bergan ma’lumot bo‘yicha 26-oktabr holatiga Bag‘dod shahri va boshqa viloyatlardagi namoyishlar qurbonlari 74 nafarga yetgan, 3,6 ming odam turli darajadagi tan jarohatlari olgan. Avval namoyishlarda 63 nafar odamning halok bo‘lgani, jarohatlangalar esa 2,5 mingdan oshgani xabar qilingandi.
Izoh (0)