Ироқ пойтахти Бағдод ва мамлакат жанубидаги бошқа шаҳарларда талабаларнинг норозилик намойишлари бўлиб ўтмоқда. Бу ҳақда «ТАСС» хабар берди.
Талабалар ёшлар ўртасидаги ишсизлик кўрсаткичининг юқорилиги ва аҳоли турмуш шароитининг оғирлашгани, ҳукумат тузилмаларида коррупция кучайиб кетгани сабабли Басра, Ан-Нажафа, Амар, Ад-Девония ва Майсан шаҳарларида намойишлар ўтказмоқда. Ироқ ўқитувчиларининг касаба уюшмалари ҳам Жануб талабаларининг ҳаракатини қўллаб-қувватлаган ҳолда ўз ҳудудларидаги норозилик тадбирларида иштирок этишни бошлаган.
Маълумотларга кўра, ўқитувчилар иштирокидаги норозиликлар мамлакат мактабларида ҳар куни дарслар ўтиладиган вақтларда бўлиб ўтмоқда.
Бағдоддаги қўзғалонларга мактаб ўқувчилари ҳамда олий таълим муассасаларининг талабалари ҳам қўшилди ва улар Таҳрир майдонидаги мамлакатда тезкор равишда ислоҳотлар ўтказилиши ҳамда ёш мутахассисларга муносиб шароитлар яратилишини талаб қилаётганларни қўллаб-қувватламоқда.
Ироқ маориф вазири Соҳа ал-Али Бек катта синфда ўқийдиганларнинг норозиликларда қатнашмаслиги лозимлиги, мактаб раҳбарияти ва ўқитувчилар кенгаши ўқувчиларнинг ҳаёти ҳамда хавфсизлигига жавобгарлигини билдирган. Бағдоддаги операцияни бошқараётган кучишлатар тизим вакиллари ҳам мактаб ўқувчиларининг ушбу ҳаракатлардаги иштирокига қарши эканлигини маълум қилган.
Ҳукуматнинг огоҳлантиришига қарамай талабалар халқнинг норозилик намойишлари иштирокчиларига айланди. Полициячиларнинг қўзғалончиларга қарши шовқин чиқарувчи гранаталар ишлатганлиги ҳақида хабарлар тарқалган.
Инсон ҳуқуқлари бўйича Ироқ олий комиссияси берган маълумот бўйича 26 октябрь ҳолатига Бағдод шаҳри ва бошқа вилоятлардаги намойишлар қурбонлари 74 нафарга етган, 3,6 минг одам турли даражадаги тан жароҳатлари олган. Аввал намойишларда 63 нафар одамнинг ҳалок бўлгани, жароҳатлангалар эса 2,5 мингдан ошгани хабар қилинганди.
Изоҳ (0)