O‘zbekiston Bosh prokuraturasi huzuridagi Majburiy ijro byurosining shtat tarkibi yangilanishi mumkin. Bu muhokama uchun e’lon qilingan “Sud hujjatlari va boshqa organlar hujjatlarini majburiy ijro etish tizimini yanada takomillashtirish chora-tadbirlari to‘g‘risida”gi Prezident farmonida ko‘zda tutilgan.
Qaror loyihasiga ko‘ra, 2020-yilning 1-yanvaridan boshlab Qoraqalpog‘iston Respublikasi, viloyatlar va Toshkent shahrida umumiy shtatlari soni 275 nafar davlat ijrochilaridan iborat bo‘lgan Byuroning 15 ta tumanlararo bo‘limi tashkil etiladi. Bo‘limlarning vazifasi soddalashtirilgan ijro ishi yuritish tartibida ijro hujjatlarini majburiy ijro etish hisoblanadi.
Byuroning tuman (shahar) bo‘limlarida umumiy boshqaruv xodimlarining soni 201 nafar bo‘lgan tashkiliy nazorat va murojaatlar bilan ishlash bo‘yicha sektorlar tashkil etilishi rejalashtirilmoqda. Sektorlarning asosiy vazifalari sifatida ijroni, murojaatlar bilan ishlashni nazorat qilish, ish yuritish va arxiv ishini tashkil etish belgilanadi.
Loyihaga ko‘ra, 2020-yilning 1-yanvaridan 1301 nafar, 1-iyulidan 4298 nafar xodim O‘zbekiston Respublikasi Bosh prokuraturasi Akademiyasida boshlang‘ich tayyorlov bo‘yicha maxsus bir oylik kursni o‘tagandan so‘ng davlat ijrochisi lavozimiga tayinlanadi.
Bosh prokuratura Akademiyasi bilan birgalikda tinglovchilarga kasb odobnomasi, psixologiya, konfliktologiya va vaqtni boshqarish asoslarini o‘rgatish, shuningdek, ularni Byuroning axborot tizimlari va dasturiy komplekslari bilan ishlash ko‘nikmalariga o‘qitishni nazarda tutuvchi maxsus boshlang‘ich tayyorgarlik kursi dasturini tasdiqlash ko‘zda tutilmoqda.
Izoh (0)