Ўзбекистон Бош прокуратураси ҳузуридаги Мажбурий ижро бюросининг штат таркиби янгиланиши мумкин. Бу муҳокама учун эълон қилинган «Суд ҳужжатлари ва бошқа органлар ҳужжатларини мажбурий ижро этиш тизимини янада такомиллаштириш чора-тадбирлари тўғрисида»ги Президент фармонида кўзда тутилган.
Қарор лойиҳасига кўра, 2020 йилнинг 1 январидан бошлаб Қорақалпоғистон Республикаси, вилоятлар ва Тошкент шаҳрида умумий штатлари сони 275 нафар давлат ижрочиларидан иборат бўлган Бюронинг 15 та туманлараро бўлими ташкил этилади. Бўлимларнинг вазифаси соддалаштирилган ижро иши юритиш тартибида ижро ҳужжатларини мажбурий ижро этиш ҳисобланади.
Бюронинг туман (шаҳар) бўлимларида умумий бошқарув ходимларининг сони 201 нафар бўлган ташкилий назорат ва мурожаатлар билан ишлаш бўйича секторлар ташкил этилиши режалаштирилмоқда. Секторларнинг асосий вазифалари сифатида ижрони, мурожаатлар билан ишлашни назорат қилиш, иш юритиш ва архив ишини ташкил этиш белгиланади.
Лойиҳага кўра, 2020 йилнинг 1 январидан 1301 нафар, 1 июлидан 4298 нафар ходим Ўзбекистон Республикаси Бош прокуратураси Академиясида бошланғич тайёрлов бўйича махсус бир ойлик курсни ўтагандан сўнг давлат ижрочиси лавозимига тайинланади.
Бош прокуратура Академияси билан биргаликда тингловчиларга касб одобномаси, психология, конфликтология ва вақтни бошқариш асосларини ўргатиш, шунингдек, уларни Бюронинг ахборот тизимлари ва дастурий комплекслари билан ишлаш кўникмаларига ўқитишни назарда тутувчи махсус бошланғич тайёргарлик курси дастурини тасдиқлаш кўзда тутилмоқда.
Изоҳ (0)