O‘zbekiston Milliy gvardiyasi Harbiy-texnik instituti tashabbusi bilan Toshkent shahar Olmazor tumani umumta’lim maktablarining 10—11-sinf o‘quvchilari o‘rtasida sportning voleybol hamda stol tennisi turlari bo‘yicha Olmazor tuman birinchilik musobaqalari o‘tkazildi. Bu haqda Milliy gvardiya axborot xizmati “Daryo”ga ma’lum qildi.
Mazkur musobaqalarda 34 ta umumiy o‘rta ta’lim maktabining o‘quvchilari faol qatnashdi. Chempionatlar yakuniga ko‘ra, barcha g‘oliblar tashkilotchilar tomonidan medal va esdalik sovg‘alari bilan taqdirlandi.
Shuningdek, Harbiy-texnik institut tomonidan Toshkent shahrining Olmazor tumanida joylashgan sakkizta umumiy o‘rta ta’lim maktabi va bitta imkoniyati cheklangan bolalar maktab-internatida faoliyati yo‘lga qo‘yilgan jiu-jitsu bo‘yicha bepul sport to‘garaklari qatnashchilari o‘rtasida jiu-jitsu sport turi bo‘yicha yoshlar va o‘smirlar o‘rtasida tuman ochiq chempionati bo‘lib o‘tdi.
O‘zbekiston Milliy gvardiyasi Harbiy-texnik instituti, O‘zbekiston jiu-jitsu federatsiyasi va Toshkent shahar Olmazor tumani Xalq ta’limi bo‘limi hamkorligida tashkil etilgan musobaqada o‘quvchi-yoshlar murabbiylaridan o‘rgangan ko‘nikmalarini sport maydonida muvaffaqiyatli namoyish etib, faxrli o‘rinlar va bir qator nominatsiyalar bo‘yicha munosib taqdirlandi.
Izoh (0)