Xalq ta’limi vaziri Sherzod Shermatov tomonidan Toshkent shahar xalq ta’limi bosh boshqarmasiga jo‘natilgan xatda shahardagi maktablarda noqonuniy ravishda turniketlar va kuzatuv kameralari o‘rnatish niqobi ostida ota-onalardan pul yig‘ishlarni to‘xtatish so‘ralgan.
Vazirlikning bosh boshqarmaga jo‘natilgan rasmiy xatiga ko‘ra, Xalq ta’limi vazirligiga ijtimoiy hamda mobil operatorlar tarmoqlari orqali ota-onalarning o‘z farzandi tarbiyasidagi mas’uliyatini oshirishga qaratilgan ijtimoiy xabarlarni yuborish tizimini joriy etish, shuningdek, tajriba-sinov tariqasida Toshkent shahridagi umumta’lim muassasalarida o‘quvchilar davomatini nazorat qilish elektron axborot tizimini yaratish vazifalari yuklatilgan. Bu vazifa O‘zbekiston Prezidenti raisligida 2019-yil 23-avgustda yoshlarni vatanparvarlik ruhida tarbiyalash va jamiyatda o‘qituvchi mavqeini oshirish masalalariga bag‘ishlab o‘tkazilgan videoselektor majlisi bayonida belgilab qo‘yilgan.
Ushbu yo‘nalishda xususiy sektor investitsiyalari jalb qilinib, elektron axborot tizimi tajriba-sinovdan o‘tkazilmoqda, deyiladi vazirlik xatida.
Vazirlik tomonidan qayd etilishicha, Toshkent shahridagi aksariyat umumta’lim maktablari direktorlari tomonidan o‘zboshimchalik qilinib, maktab kuzatuv kengashi a’zolari va ota-onalar fikrlarini chalg‘itgan holda noqonuniy pul yig‘imlari bilan shug‘ullanib, turli xildagi turniketlar hamda kuzatuv kameralari o‘rnatilmoqda.
Shu munosabat bilan vazirlikning xatida Toshkent shahar xalq ta’limi bosh boshqarmasi boshlig‘idan boshqarma tasarrufiga kiruvchi ta’lim muassasalarida noqonuniy ravishda turniketlar va kuzatuv kameralari o‘rnatish niqobi ostida ota-onalardan pul yig‘ishlarni to‘xtatish so‘ralgan.
Avvalroq xalq ta’limi vaziri o‘rinbosari Dilshod Kenjayev 17-oktabr kuni barcha hududiy boshqarmalarga rasmiy xat yuborgani, unda hukumatning 2019-yil 14-oktabrdagi videoselektor majlisi ijrosini ta’minlash maqsadida 2019—2020-o‘quv yilining 2-choragidan boshlab dars va mashg‘ulotlar har kuni O‘zbekiston madhiyasini kuylashdan boshlanishi belgilangani haqida xabar berilgan edi.
Izoh (0)