Yangiyo‘l taksichilarini Telegram’da haqorat qilganlikda gumonlanayotgan IIB xodimiga nisbatan xizmat tekshiruvi o‘tkazilmoqda

Bosh prokuratura tomonidan “Daryo”ga ma’lum qilinishicha, 22-oktabr, seshanba kuni Telegram’dagi “Voditeli Yangiyulya” kanaliga o‘zini Yangiyo‘l tuman YHXB boshlig‘ining o‘rinbosari Usmon deb tanishtirgan shaxs 38 soniyalik audiofaylni joylashtirgan. Audioyozuvda shu guruh ishtirokchilari hisoblangan 1650 nafar taksi haydovchisini qo‘pol tarzda haqoratlangan, ularning sha’ni va qadr qimmatini kamsituvchi so‘zlar aytilgan. Bu, o‘z navbatida, keng jamoatchilikning haqli e’tirozlariga sabab bo‘lgan.

“Voditeli Yangiyulya” guruhi a’zolari O.Mirzayev va boshqalar 23-oktabr, chorshanba kuni mazkur holat bo‘yicha Yangiyo‘l tuman prokuraturasiga ariza bilan murojaat qilgan. Murojaatchilar Yangiyo‘l tuman YHXB boshlig‘ining o‘rinbosari Usmon ismli shaxsning xatti-harakatlaridan noroziligini bildirib, qonuniy chora ko‘rishni so‘ragan.

Mazkur ariza bo‘yicha o‘tkazilgan tergovga qadar tekshiruv jarayonida, murojaatda ko‘rsatilgan Usmon ismli shaxs Yangiyo‘l tumani IIB YXHB boshlig‘ining o‘rinbosari lavozimida xizmat qilib kelayotgan leytenant Usmon Z. ekanligi aniqlangan. Undan holat yuzasidan izoh so‘ralganda, u ushbu ovozli yozuvlar uniki emasligini, boshqa bir noma’lum shaxs ushbu yozuvlarni ijtimoiy tarmoqqa joylashtirganini bildirgan.

Shuningdek, ushbu ovozli yozuv keng jamoatchilikning muhokamasiga sabab bo‘layotganligi bois hamda haqiqatga oydinlik kiritish maqsadida, tuman YHXB boshlig‘i o‘rinbosari leytenant Usmon Z.ga nisbatan idoraviy tartibda Toshkent viloyat IIBBga hamda IIB YHXBga xizmat tekshiruvi tayinlandi.

Hozirgi vaqtda Yangiyo‘l tuman prokuraturasi tomonidan tergovga qadar tekshiruv harakatlari olib borilmoqda.