Бош прокуратура томонидан «Дарё»га маълум қилинишича, 22 октябрь, сешанба куни Telegram’даги «Водители Янгиюля» каналига ўзини Янгийўл туман ЙҲХБ бошлиғининг ўринбосари Усмон деб таништирган шахс 38 сониялик аудиофайлни жойлаштирган. Аудиоёзувда шу гуруҳ иштирокчилари ҳисобланган 1650 нафар такси ҳайдовчисини қўпол тарзда ҳақоратланган, уларнинг шаъни ва қадр қимматини камситувчи сўзлар айтилган. Бу, ўз навбатида, кенг жамоатчиликнинг ҳақли эътирозларига сабаб бўлган.
«Водители Янгиюля» гуруҳи аъзолари О.Мирзаев ва бошқалар 23 октябрь, чоршанба куни мазкур ҳолат бўйича Янгийўл туман прокуратурасига ариза билан мурожаат қилган. Мурожаатчилар Янгийўл туман ЙҲХБ бошлиғининг ўринбосари Усмон исмли шахснинг хатти-ҳаракатларидан норозилигини билдириб, қонуний чора кўришни сўраган.
Мазкур ариза бўйича ўтказилган терговга қадар текширув жараёнида, мурожаатда кўрсатилган Усмон исмли шахс Янгийўл тумани ИИБ ЙХҲБ бошлиғининг ўринбосари лавозимида хизмат қилиб келаётган лейтенант Усмон З. эканлиги аниқланган. Ундан ҳолат юзасидан изоҳ сўралганда, у ушбу овозли ёзувлар уники эмаслигини, бошқа бир номаълум шахс ушбу ёзувларни ижтимоий тармоққа жойлаштирганини билдирган.
Шунингдек, ушбу овозли ёзув кенг жамоатчиликнинг муҳокамасига сабаб бўлаётганлиги боис ҳамда ҳақиқатга ойдинлик киритиш мақсадида, туман ЙҲХБ бошлиғи ўринбосари лейтенант Усмон З.га нисбатан идоравий тартибда Тошкент вилоят ИИББга ҳамда ИИБ ЙҲХБга хизмат текшируви тайинланди.
Ҳозирги вақтда Янгийўл туман прокуратураси томонидан терговга қадар текширув ҳаракатлари олиб борилмоқда.
Изоҳ (0)