Ijtimoiy tarmoqlarda tarqalgan xususiy tadbirkor Sh.Yusupovning Prezidentga yo‘llagan videomurojaati yuzasidan Bosh prokuratura bayonot berdi.
Qayd etilishicha, Bosh prokuratura tomonidan ijtimoiy tarmoqlarda fuqaro Sh.Yusupov va uning tarafdorlari tomonidan e’lon qilingan videomurojaatlar o‘rganilgan.
Unga ko‘ra, Sh.Yusupov onlayn-auksion orqali 326 million so‘mga mulk sotib olganligi, lekin huquqni muhofaza qiluvchi organlar ushbu mulkni undan olib qo‘yish maqsadida asossiz ravishda unga nisbatan jinoyat ishi qo‘zg‘atib, uni qamoqqa olmoqchi ekanligi, Bosh prokuratura boshqarma boshlig‘i va’da bergan bo‘lsa-da, jinoyat ishi bo‘yicha tergov Andijon viloyat prokuraturasidan Namangan viloyati prokuraturasiga o‘tkazilmaganligini bildirgan.
Aniqlanishicha, Sh.Yusupov rahbarligidagi “Yu.” MChJ auksionda ishtirok etib, Oltinko‘l tumanidagi ferma bino-inshootlarini 326 million so‘mga sotib olgan.
Mazkur ferma bino-inshootlari Sh.Yusupovga tilxat asosida topshirilib, auksionga qo‘yilmagan bino-inshootlar, mol-mulklar va chorva mollari tegishli tartibda olib chiqib ketilishi tushuntirilgan.
Sh.Yusupovning murojaatiga asosan Majburiy ijro byurosi Andijon viloyat boshqarmasi tomonidan xizmat tekshiruvi o‘tkazilib, MIB xodimlari tomonidan hujjatlarga auksionda sotilgan mulk haqida noto‘g‘ri ma’lumotlar kiritilganligi holati yuzasidan Andijon viloyat prokuraturasi tomonidan Jinoyat kodeksining 205-moddasi 1-qismi bilan jinoyat ishi qo‘zg‘atilgan bo‘lib, hozirda tergov harakatlari olib borilmoqda.
Tergov harakatlari davomida ferma bino-inshootlari Sh.Yusupov tomonidan sotib olingan bo‘lsa-da, MIB xodimlari tomonidan ogohlantirilgan bo‘lishiga qaramasdan, auksion savdolariga qo‘yilmagan va g‘oliblik bayonnomasiga kiritilmagan 300 million so‘mlik qurilish mahsulotlarini sotib yuborib, juda ko‘p miqdordagi mulklarni o‘zlashtirish yo‘li bilan talon-toroj qilgan.
Shunga ko‘ra, joriy yilning 22-oktabr kuni Sh.Yusupov Jinoyat kodeksining 167-moddasi 3-qismi “a” bandi, 168-moddasi 4-qismi “a” bandi va boshqa moddalarida nazarda tutilgan jinoyatlarni sodir etganlikda gumonlanuvchi tariqasida jalb qilinib, Jinoyat protsessul kodeksining 221-moddasi tartibida ushlangan.
Bundan tashqari, gumonlanuvchi Sh.Yusupov muqaddam sodir etgan jinoyatlari uchun 2014-yilning 15-yanvarida JIB Namangan viloyat sudining hukmiga asosan Jinoyat kodeksining 168-moddasi 1-qismi, 210-moddasi 3-qismi “b” bandi va boshqa moddalari bilan aybli deb topilib, 11 yil muddatga ozodlikdan mahrum qilingan.
Qayd etilgan jinoyat ishining tergovi Bosh prokuratura tomonidan nazoratga olingan bo‘lib, tergovni hududiyligiga ko‘ra Namangan viloyat prokuraturasiga o‘tkazilishiga zaruriyat aniqlanmagan.
Izoh (0)