Bosh prokuratura huzuridagi Departamentning Bektemir tumani bo‘limi polimer truba va boshqa mahsulotlarni yaroqsiz holatga kelganligi sababli soxta shartnoma, solishtirma dalolatnoma va boshqa hujjatlarni tuzgan shaxslarni aniqladi. Bu haqda Bosh prokuratura “Daryo”ga ma’lum qildi.
Ma’lumotlarga ko‘ra, “E-P” MChJning mansabdor shaxslari Mirobod “Maxsustrans” korxonasi mansabdor shaxslari va boshqalar bilan o‘zaro til biriktirib, jamiyatga kirim bo‘lgan polimer truba va boshqa mahsulotlarni go‘yoki yaroqsiz holatga kelganligi sababli Mirobod “Maxsustrans” korxonasiga topshirilganligi haqida soxta shartnoma, solishtirma dalolatnoma va boshqa hujjatlarni tuzgan. Aslida ushbu korxonaga topshirilmagan jami 7,013 milliard so‘mlik mahsulotlarni naqd pulga sotib, savdo tushumini bankka kirim qilmasdan, budjetga to‘lanishi lozim bo‘lgan 350,6 million so‘m yagona soliq to‘lovlarini to‘lashdan bo‘yin tovlaganligi aniqlangan.
Korxona mansabdor shaxslariga bir oy muddat ichida yagona soliq to‘lovlarini budjetga to‘lashi lozimligi tushuntirilib, 23-iyulda rasman ogohlantirilgan.Mazkur holat yuzasidan “E-P” MChJ mansabdor shaxslariga, Mirobod “Maxsustrans” korxonasi mansabdor shaxslari va boshqalarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)