Сирдарёда микроавтобус ҳайдовчилари билан юзага келган муаммо бўйича Транспорт вазирлиги матбуот хизмати расмий баёнот берди.
Ўзбекистонда йўл ҳаракати барча иштирокчиларининг хавфсизлигини таъминлаш, автомобиль транспортида йўловчиларни ташишда йўл-транспорт ҳодисаларига йўл қўймаслик мақсадида 2019 йил 21 май куни Вазирлар Маҳкамасининг «Йўловчиларни автобусда ташиш хавфсизлигини таъминлашга доир қўшимча чора-тадбирлар тўғрисида»ги қарори қабул қилинган
Мазкур қарорнинг 1-бандига мувофиқ, 2019 йил 1 сентябрдан бошлаб фойдаланиш муддати 15 йилдан ортиқ бўлган автобусларда йўловчиларни ташишга лицензия карточкалари берилишига йўл қўйилмаслиги ҳамда 2021 йил 1 январдан бошлаб фойдаланиш муддати 15 йилдан ортиқ бўлган автобусларда йўловчиларни ташиш тақиқланганлиги белгиланган.
Ушбу қарордан сўнг айрим транспорт уюшмалари ва уларга аъзо ҳайдовчилар ўртасида энди фойдаланиш муддати 15 йилдан ошган микроавтобусларга ҳам лицензия бериш тўхтатилади деган нотўғри фикр юзага келган. Ана шундай ҳолат Сирдарё вилоятида кузатилган.
Вазирлик баёнотида айтилишича, вилоят транспорт бошқармаси раҳбарияти томонидан ушбу қарор мазмун-моҳияти транспорт уюшмалари раҳбарларига тўлиқ тушунтирилмаганлиги қолаверса, лицензия бериш жараёнида ортиқча сансоларликка йўл қўйилиши микроавтобус ҳайдовчиларининг ҳақли эътирозларини келтириб чиқарди.
Ушбу ҳолат юзасидан Транспорт вазирлигининг автомобиль ва дарё транспортини ривожлантириш департаменти ва юридик бошқармаси вакилларидан иборат махсус ишчи гуруҳ 5 октябрь куни Сирдарё вилояти транспорт бошқармасида йўловчи ташувлари соҳасида фаолият юритиб келаётган уюшма раҳбарлари ва ҳайдовчилар билан сайёр қабул ўтказган.
Қабул давомида иштирокчиларга қарорнинг мазмун-моҳияти атрофлича тушунтирилиб, қатнашчиларни қизиқтирган саволларга мутахассислар томонидан батафсил жавоб берилган. Ҳайдовчилар билан бўлиб ўтган очиқ мулоқотда улар лицензия варақалари олиш учун ўзи аъзо бўлган уюшмалар орқали ҳудудий транспорт бошқармасига белгиланган тартибда ариза билан мурожаат этмагани аниқланган.
Ишчи гуруҳ томонидан барча ҳайдовчиларга лицензия олиш тартиб қоидалари яна бир бор батафсил тушунтирилиб, вилоят транспорт бошқармасига келиб тушган аризалар бўйича ўз муддатида лицензия варақаларини тақдим этиш бўйича кўрсатма берилган.
Учрашув давомида Сирдарё вилояти транспорт бошқармаси раҳбари Ойбек Эрбеков ҳайдовчилардан уларнинг иш фаолияти давомида юзага келган ноқулайликлар учун узр сўраб, бу каби ҳолат бошқа такрорланмаслигини таъкидлаган.
Сайёр қабул давомида белгиланган вазифалар ижросини назорат қилиш мақсадида 19 октябрь, шанба куни махсус ишчи гуруҳ Сирдарё вилоятига ташриф буюриб, йўловчи ташувлари соҳасида фаолият юритиб келаётган уюшма раҳбарлари ва ҳайдовчилар билан яна бир бор учрашув ўтказганда Транспорт уюшмалари раҳбарлари билан бўлиб ўтган мулоқот давомида уларга лицензия варақалари тўлиқ равишда берилганлиги маълум бўлган.
Изоҳ (0)