Joriy yil Ramazon oyida Suriyadan qaytarilgan 156 nafar O‘zbekiston fuqarolarining 4 nafari qashqadaryolik ayollar ekanligi ma’lum qilindi. Bu haqda “Daryo”ga Dehqonobod tuman hokimligi axborot xizmati xabar berdi.
Ma’lum qilinishicha, Dehqonobod kaliy zavodida O‘zbekistonda xotin-qizlarga oid davlat siyosati, xotin-qizlar ma’naviyatini yuksaltirish, oilalarda milliy qadriyatlarni asrab-avaylash, o‘zaro mehr-oqibat va hamjihatlikni ta’minlash masalalariga bag‘ishlangan seminar bo‘lib o‘tgan.
Unda O‘zbekiston Musulmonlar idorasining viloyatdagi vakilligi bosh otinoyisi Shoira Karomova Suriyadan qaytgan 4 nafar qashqadaryolik ayol haqida ma’lumot berib, ular bilan suhbatlashilganda ayollar katta xatoga yo‘l qo‘yganini kech anglab yetgani xususida gapirgan.
“Qarshi shahridagi kasb-hunar kollejlarining birida tahsil olgan, 1993-yil tug‘ilgan yosh qizlarimizdan biri o‘zbek yigitini sevib qolib, u bilan avval Rossiya davlatiga ketadi. Rossiyadan Turkiyaga, undan so‘ng esa Suriyaga o‘tib ketgani haqida gapirib berdi. Sevib turmush qurgan insoni Suriyadagi janglarning birida halok bo‘lgach, o‘zbek ayoli avval livanlik yigitga, so‘ngra arab yigitiga turmushga chiqishga majbur bo‘ladi. Xullas, boshidan ne-ne kunlarni o‘tkazib, Vatanimizga 3 nafar farzandi bilan qaytadi. O‘sha o‘zbek qizining bir gapi meni juda ta’sirlantirdi. “O‘zimga qanday jazo berishsa ham roziman, boisi men Vatanga sotqinlik qildim, shunday yurtimni tashlab chiqib ketdim. Ammo farzandlarim tinch va osuda osmon ostida — Vatanimizda yashashini xohlayman”, — deydi Shoira Karomova.
Viloyatda jamiyatdagi faol va tashabbuskor ayollarning 50 nafaridan iborat targ‘ibot guruhi shakllantirilgan bo‘lib, ular ishtirokida xotin-qizlarga oid davlat siyosati, xotin-qizlar ma’naviyatini yuksaltirish, oilalarda milliy qadriyatlarimizni asrab-avaylash, o‘zaro mehr-oqibat va hamjihatlikni ta’minlash masalalariga bag‘ishlangan seminarlar bo‘lib o‘tmoqda.
Mavzuga doir: Suriyadan qaytarilgan buxorolik ayol: Farzandlarim tinchlik nimaligini bilmay ulg‘aydi
Suriyadan qaytarilgan ayollar va bolalar sog‘lomlashtirish muassasalariga joylashtirildi, keyinroq ularga pasport hamda tug‘ilganlik guvohnomalari taqdim etildi.
Izoh (0)