Sumalak haqidagi hikoya sabab O‘zbekiston musulmonlari idorasida to‘polon ko‘targan ikki shaxsga sud hukmi o‘qildi

Toshkentda Sumalak haqidagi hikoya sabab O‘zbekiston musulmonlari idorasida to‘polon ko‘targan Rustambek Karimov va To‘lqin Astanovga nisbatan ochilgan sud ishi 18-oktabr, juma kuni nihoyasiga yetdi va sud hukmi e’lon qilindi.

Oliy sud matbuot xizmati rahbari vazifasini bajaruvchi Aziz Obidovning “Daryo”ga ma‘lum qilishicha, mazkur jinoyat ishi jinoyat ishlari bo‘yicha Toshkent shahar sudi sudyasi Orif Qilichev raisligida ko‘rib chiqildi.

E’lon qilingan sud hukmiga ko‘ra, Rustambek Karimov Jinoyat kodeksi 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 1-qismida nazarda tutilgan jinoyatni sodir etganlikda aybdor deb topildi.

Unga 2 yil muddatga ozodlikdan mahrum qilish jazosi tayinlanib, Jinoyat kodeksining 59-moddasi (bir necha jinoyat sodir etganlik uchun jazoy tayinlash) 8-qismi tartibida jinoyat ishlari bo‘yicha Sergeli tumani sudining 2019-yil 16-maydagi hukmi bilan tayinlangan jazoning o‘talmagan qismini qisman qo‘shish yo‘li bilan uzil-kesil o‘tash uchun 3 yil-u 1 oy muddatga ozodlikdan mahrum qilish jazosi tayinlandi. Tayinlangan jazoni manzil koloniyalarda o‘tattirish belgilandi.

To‘lqin Astanov Jinoyat kodeksi 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandida nazarda tutilgan jinoyatni sodir etganlikda aybdor deb topildi.

Unga 5 yil muddatga ozodlikdan mahrum qilish jazosi tayinlanib, Jinoyat kodeksining 72-moddasi (shartli hukm qilish) tartibida, tayinlangan 5 yil muddatga ozodlikdan mahrum qilish jazosi shartli deb hisoblanib, 2 yil sinov muddati belgilandi. Sinov muddati hukm chiqarilgan kundan boshlab hisoblanishi ko‘rsatildi.

Eslatib o‘tamiz, shu yilning 8-aprel kuni To‘lqin Astanov va Rustam Karimov O‘zbekiston Musulmonlar idorasiga filologiya fanlari nomzodi Ergash Ochilovning “Ma’rifat daftari” nomli kitobchasidan olingan “Sumalak” nomli hikoyacha bo‘yicha izoh so‘rab borgan.

Izohni shaxsan muftiy Usmonxon Alimov berishini talab qilgan; “hazrat safardalar, o‘rnilariga, mana, o‘rinbosarlari — Abdulaziz Mansur bor”, deb idora vakillari shayx bilan uchrashtirgan.

U yerda idora raisi o‘rinbosari Abdulaziz Mansur bilan halol sertifikati, o‘quv yurtlarida hijob o‘rash mavzularida samimiy suhbat qurgani hamda Abdulaziz Mansur unga kitob hadya etganini bildirgan edi.

Mehmonlar shayxning javobidan qoniqmay, idorada to‘polon ko‘targan. Oxiri militsiyani chaqirishga to‘g‘ri kelgan. Militsiya esa ularga nisbatan ma’muriy bayonnoma rasmiylashtirgan.