Сумалак ҳақидаги ҳикоя сабаб Ўзбекистон мусулмонлари идорасида тўполон кўтарган икки шахсга суд ҳукми ўқилди

Тошкентда Сумалак ҳақидаги ҳикоя сабаб Ўзбекистон мусулмонлари идорасида тўполон кўтарган Рустамбек Каримов ва Тўлқин Астановга нисбатан очилган суд иши 18 октябрь, жума куни ниҳоясига етди ва суд ҳукми эълон қилинди.

Олий суд матбуот хизмати раҳбари вазифасини бажарувчи Азиз Обидовнинг «Дарё»га маълум қилишича, мазкур жиноят иши жиноят ишлари бўйича Тошкент шаҳар суди судьяси Ориф Қиличев раислигида кўриб чиқилди.

Эълон қилинган суд ҳукмига кўра, Рустамбек Каримов Жиноят кодекси 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 1-қисмида назарда тутилган жиноятни содир этганликда айбдор деб топилди.

Унга 2 йил муддатга озодликдан маҳрум қилиш жазоси тайинланиб, Жиноят кодексининг 59-моддаси (бир неча жиноят содир этганлик учун жазой тайинлаш) 8-қисми тартибида жиноят ишлари бўйича Сергели тумани судининг 2019 йил 16 майдаги ҳукми билан тайинланган жазонинг ўталмаган қисмини қисман қўшиш йўли билан узил-кесил ўташ учун 3 йилу 1 ой муддатга озодликдан маҳрум қилиш жазоси тайинланди. Тайинланган жазони манзил колонияларда ўтаттириш белгиланди.

Тўлқин Астанов Жиноят кодекси 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «г» бандида назарда тутилган жиноятни содир этганликда айбдор деб топилди.

Унга 5 йил муддатга озодликдан маҳрум қилиш жазоси тайинланиб, Жиноят кодексининг 72-моддаси (шартли ҳукм қилиш) тартибида, тайинланган 5 йил муддатга озодликдан маҳрум қилиш жазоси шартли деб ҳисобланиб, 2 йил синов муддати белгиланди. Синов муддати ҳукм чиқарилган кундан бошлаб ҳисобланиши кўрсатилди.

Эслатиб ўтамиз, шу йилнинг 8 апрель куни Тўлқин Астанов ва Рустам Каримов Ўзбекистон Мусулмонлар идорасига филология фанлари номзоди Эргаш Очиловнинг «Маърифат дафтари» номли китобчасидан олинган «Сумалак» номли ҳикояча бўйича изоҳ сўраб борган.

Изоҳни шахсан муфтий Усмонхон Алимов беришини талаб қилган; «ҳазрат сафардалар, ўрниларига, мана, ўринбосарлари — Абдулазиз Мансур бор», деб идора вакиллари шайх билан учраштирган.

У ерда идора раиси ўринбосари Абдулазиз Мансур билан ҳалол сертификати, ўқув юртларида ҳижоб ўраш мавзуларида самимий суҳбат қургани ҳамда Абдулазиз Мансур унга китоб ҳадя этганини билдирган эди.

Меҳмонлар шайхнинг жавобидан қониқмай, идорада тўполон кўтарган. Охири милицияни чақиришга тўғри келган. Милиция эса уларга нисбатан маъмурий баённома расмийлаштирган.