Yaponiya kompaniyalari O‘zbekiston gaz uzatish tizimini modernizatsiya qilish bo‘yicha tenderda ishtirok etadi
Yaponiyaning Itochu Corporation va Marubeni Corporation kabi yetakchi kompaniyalari O‘zbekiston gaz uzatish tizimini modernizatsiya qilish bo‘yicha tenderda ishtirok etadi, deb xabar bermoqda Energetika vazirligi matbuot xizmati.
Qayd etilishicha, 2019-yilning sentabrida Energetika vazirligi delegatsiyasining Yaponiyaga tashrifi natijasiga ko‘ra, mamlakatning Itochu Corporation va Marubeni Corporation kabi yetakchi kompaniyalari “Dispetcherlik markazi, monitoring va gaz infratuzilmasi obyektlarini boshqarishni (SCADA) joriy etish bilan O‘zbekiston Respublikasida gaz uzatish tizimini modernizatsiyalash” loyihasini hamkorlikda amalga oshirish borasida qiziqish bildirgani munosabati bilan uchrashuv tashkil etildi.
Uchrashuvda “O‘ztransgaz” aksiyadorlik jamiyati tomonidan ikki bosqichda amalga oshirilishi ko‘zda tutilayotgan “O‘zbekiston Respublikasi gaz uzatish tizimini modernizatsiya qilish loyihasi” taqdimoti o‘tkazilgan.
Yaponiya kompaniyalari loyihaning Osiyo taraqqiyot banki tomonidan moliyalashtiriladigan birinchi bosqichini amalga oshirish bo‘yicha xalqaro tenderda ishtirok etish istagida ekanini, loyihaning ikkinchi bosqichida esa Yaponiyaning imtiyozli moliyalashtirishini jalb etish bilan qatnashish fikrida ekanini bildirgan.
Uchrashuv yakunida tomonlar 2019-yilning noyabr oyida Yaponiya kompaniyalari ishtirokida loyihaning ikkinchi bosqichini moliyalashtirish va amalga oshirishni batafsil muhokama qilish maqsadida ishchi guruhlar o‘rtasida qo‘shimcha uchrashuvlar tashkil etishga kelishgan.
