Turkiya prezidenti Rajab Toyyib Erdo‘g‘on Turkiya harbiylarining Suriya shimolidagi operatsiyani davom ettirayotgani haqidagi xabarlar yolg‘on axborot ekanligini bildirdi, deb yozmoqda “Interfaks”.
“Bu kabi xabarlarning hammasi yolg‘on axborotlar (dezinformatsiya)”, — deya Erdo‘g‘on so‘zlarini keltirgan mahalliy OAV.
Erdo‘g‘on Turkiya mudofaa vazirligi bergan ma’lumotga tayanib kurdlarning kelishuvga muvofiq tarzda chegara hududidan chiqib ketayotganligini ma’lum qilgan va turk qo‘shinlarining terrorchilar hududni tark etganligiga to‘liq ishonch hosil qilish uchun o‘z pozitsiyasida qolishini qayd etgan.
Avval Turkiyaning AQSh bilan o‘tkazilgan muzokaralardan keyin imzolangan kelishuvga amal qilmagan holda Ras al-Ayn hududidagi obyektlarga hujum qilayotgani va shaharda otishmalar, to‘qnashuvlar kuzatilayotganligi xabar qilingandi.
Turkiya rahbari Rajab Toyyib Erdo‘g‘on hamda AQSh vitse-prezidenti Mayk Pens muzokaralardan so‘ng turklarning kurdlar chegaradan uzoqlashishi uchun Suriya hududidagi operatsiyalarni 120 soatga to‘xtatishni kelishib olgan.
Mavzuga doir: Pens va Erdo‘g‘on kelishuvidan kimlar manfaatdor?
Izoh (0)