Meksika milliy politsiyasi Sinaloa shtatining Kuliakan shahridagi otishmadan so‘ng hozirda AQShda umrbod qamoq jazosini o‘tayotgan narkobaron Xoakin Gusman (El Chapo)ning o‘g‘li Ovidioni hibsga oldi. Bu haqda Meduza xabar bermoqda.
Biroq narkokartel politsiyani qurshab olib, shaharni deyarli qamal holatiga keltirganidan so‘ng uni qo‘yib yuborishga to‘g‘ri keldi.
Mamlakat xavfsizlik vaziri Alfonso Durasoga ko‘ra, Milliy gvardiya harbiylashgan patruli 17-oktabr, payshanba kuni Kuliakandagi uylarning biriga joylashib olgan kishilar hujumiga duch kelgan. Politsiyachilar uyga kirib, Gusmanning o‘g‘li Ovidioni hibsga olgan, biroq 30 kishidan iborat patrul ulardan son jihatdan ko‘p bo‘lgan narkokartel kuchlari tomonidan qurshab olingan. Politsiyachilar jonini saqlash, jinoyatchilar blokpost o‘rnatib, avtomat quroldan shiddatli otishmani boshlagan shaharda tinchlik o‘rnatish uchun manzilni Ovidiosiz tark etishga qaror qilingan.
Kuliakan shahriga ayni paytda Meksika armiyasi va politsiyasining kuchaytirilgan qismlari kirgan.
Sinaloa shtati jamoat xavfsizligi kotibi Kristobal Kastanedaning ma’lum qilishicha, otishma va barrikadalardan tashqari mojaro mobaynida qamoqxonadan 20 dan 30 nafargacha mahkum ham qochishga ulgurgan. “Biz shaharda to‘liq nazorat o‘rnatguncha fuqarolardan ko‘chalarni tark etishni so‘raymiz”, — dedi Kastaneda.
Gusmanlar oilasi advokatining bildirishicha, hozirda narkobaronning o‘g‘li tirik va ozodlikda.
Izoh (0)