Afg‘onistonda Germaniya uskunalari yo‘qolgani sabab saylovlar natijalarini e’lon qilish kechikmoqda

Afg‘oniston Mustaqil saylov komissiyasi avval taxmin qilinganidek prezidentlik saylovlarining dastlabki natijalarini 17-oktabr kuni e’lon qila olmadi.

Oxirgi yillarda Afg‘onistonda o‘tkazilgan prezidentlik saylovlarida korrupsiyaning yuqori elementlari namoyon bo‘lishi holatlari kuzatilgani sabab Germaniyaning taniqli kompaniyasi saylov uchastkalari uchun maxsus apparatlar taqdim qilgandi. Ovozlarni biometrik ma’lumotlar asosida hisob-kitob qiluvchi ushbu uskunalar saylovlarning shaffof va ochiq o‘tishini ta’minlashi ko‘zda tutilgandi.

Ammo 26 ming dona apparatdan 2 mingtasi yo‘qolib qolgan. 8 kun davomida elektron tizim umuman ishlamagan, 17-oktabrda Bosh prokuraturaning Kobul filiali biometrik apparatlarning texnik holati bilan shug‘ullanishga qaror qildi. Vaziyatni o‘nglash uchun ikki nafar nemis injeneri chaqirilgan. “Muhandislar yetib kelgan ish ma’lum ma’noda yaxshi ketmoqda”, — deydi Mustaqil saylov komissiyasi rahbari Hava Alam Nuristoniy. Uning so‘zlariga ko‘ra, komissiya 22 445 ta biometrik uskunadagi ma’lumotlarni bosh serverga qayta ishlash uchun yuborgan.

Amaldagi prezident Muhammad Ashraf G‘anining jamoasi jarayonni tezlashtirish uchun eskicha usulda ham ovozlar sonini hisoblashni taklif etdi. Saylovlar davomida elektr ta’minoti yetib bormagan yerlarda shunday qilishga urinilgandi. Mustaqil saylov komissiyasi ushbu usuldan agar Oliy sud bunga ruxsat bersa foydalanishga tayyor. Ammo bu avvalgi korrupsion sxemalarga yana qaytish ekanligini tushungan prezidentlikka nomzodini qo‘yganlar ushbu usulning qo‘llanilishiga qarshi chiqmoqda.

“Bu zo‘ravonlik harakati bo‘ladi. Afg‘on xalqining huquqiy va sud institutlariga bo‘lgan ishonchi tushib ketadi”, — deya ta’kidlagan prezidentlikka nomzodini qo‘ygan Rahmatilla Nabil.

Mustaqil saylov komissiyasi saylovlar natijalarini hisob-kitob qilayotgan vaqtda parlamentda saylovlar vaqtida zo‘ravonlik holatlarining kuzatilganligi muhokama qilina boshlandi. Munozaraning kutilmagan yakuni mamlakat IIVning “barcha maxsus xizmatlar bunday holatlardan charchadi” degani va noyabr oxirida qurol-yarog‘ va shaxsiy zirhli himoya texnikalaridan foydalanishga ruxsat berilishi haqidagi bayonoti bo‘ldi”.

IIV ushbu qarorni 110 nafar deputatning qurolga ruxsatnomasi bo‘lmay turib parlament binosida ham qurollanib yurganligi bilan izohladi. O‘z navbatida deputatlar o‘zlarining mamlakatda qurol bilan yurgan qaysi erkakdan kam joyi borligini aytib javob qaytargan.