Livanda minglab namoyishchilar Saad Haririy koalitsiyasi hukumatining soliq siyosatiga qarshi norozilik bildirmoqda. Xalqning noroziligiga hukumatning WhatsApp messenjeridan foydalanganlik uchun soliq joriy qilishi va to‘lov miqdorini oyiga 6 AQSh dollari qilib belgilangani sabab bo‘lgan. Namoyishlar vaqtida Telekommunikatsiyalar vaziri Muhammad Shukur ushbu qarorning bekor qilinganligini bildirgan. Bu haqda “TASS” xabar berdi.
Hukumat saroyi va parlament binosi yaqinidagi Riyod Solih maydonida o‘tgan noroziliklarda odamlar: “Xalq hukumat almashishini istamoqda!”, — deya baqirgan. Namoyishchilar hamda huquq-tartibot idoralari xodimlari bilan to‘qnashuvlar ham sodir bo‘lgan.
17-oktabr, payshanba kuni boshlangan norozilik harakatlari ishtirokchilari shahar va uning atrofidagi hududlarda — ko‘chalarga, avtostradalarga yonayotgan shinalarni uloqtirgan. Bayrutni mamlakatning janubiy hamda shimoliy hududlar bilan bog‘lovchi yo‘llari yopilgan, shuningdek, tog‘ dovoni yo‘nalishidagi Damashq trassasi ham egallangan. Namoyishchilar avtomobil qatnovi qismiga o‘z chodirlarini joylashtirib olgan.
18-oktabrda Livan xavfsizlik kuchlari namoyishchilarning harakatlariga qarshilik ko‘rsatib ko‘zni yoshlantiruvchi gaz qo‘llab ularni tarqatishga uringan. Ma’lumotlarga ko‘ra, ushbu harakat ta’sirida namoyishchilarning bir nechtasi hushini yo‘qotgan.
Namoyishlar sabab yuz bergan yong‘inlar natijasida xorijlik ikki nafar ishchi halok bo‘lgan. Yong‘inni o‘chirish va talafot ko‘rganlarni qutqarish ishlarini qutqaruvchilar amalga oshirmoqda.
Hozircha yong‘inning qay tariqa yuz bergani va qurbonlarning qaysi davlat fuqarolari ekanligi oydinlashtirilmagan.
“Namoyishchilar hamda huquq-tartibot idoralari xodimlari o‘rtasidagi to‘qnashuvlar natijasida 70 nafar odam talafot ko‘rgan va ularga joyida tibbiy yordam ko‘rsatilgan. 23 nafar norozilik ishtirokchisi shifoxonaga olib ketilgan”, — deyiladi Qizil Xoch tashkilotining Livandagi vakillarining bayonotida.
Mamlakatdagi Progressiv-sotsial partiya raisi Valid Jumblat Bayrut va boshqa hududlardagi noroziliklarni “xalqning isyoni” deya ta’rifladi. Parlament deputati Husayn Hoji Hasan esa hukumatdan soliq siyosatini o‘zgartirish va davlat budjetini to‘ldirish masalalarini xalqning pastki qatlamiga zarar yetkazmasdan amalga oshirishni taklif etdi.
Livan ichki ishlar vaziri Raya al-Hasan mahalliy telekanallarga bergan intervyusida mamlakatdagi vaziyat hukumat nazorati ostida ekani va bosh vazir iste’foga chiqmasligini ma’lum qilgan.
“Ayrim joylardagi tartibsizliklarga qaramay namoyishlar tinchlik bilan o‘tmoqda”, — deya qayd etgan vazir.
Livan bosh vaziri Saad Haririy vazirlar hukumat saroyigacha yo‘llardagi namoyishlar sabab yetib kela olmagani tufayli Vazirlar mahkamasining Bayrutdagi yig‘ilishini bekor qilgan.
Sentabrda mamlakat bosh vaziri “milliy iqtisodiyotda favqulodda holat” e’lon qildi va vazirlar mahkamasining davlat budjeti defitsitini 2020-moliyaviy yilda 7 foizga tushirishga qaror qilganligini bildirdi. Iyulda Livan parlamenti 2019-moliyaviy yil uchun davlat budjeti loyihasini Jahon banki tavsiyasiga ko‘ra 11 foizdan 7,5 foizga tushgan defitsit bilan tasdiqlagandi. Haririy hukumati davlat sektori va harbiylarning ijtimoiy to‘lovlari va pensiyalarini qisqartirib defoltdan qochishga urindi. 2018-yilda o‘tgan Parij-4 xalqaro konferensiyasida (“Qadr”) donor-davlatlar Livanga iqtisodiyotini barqarorlashtirishi va katta infratuzilma loyihalarini amalga oshirishi uchun 11 milliarddan ko‘proq to‘lov subsidiyalarisiz imtiyozli kreditlar ajratishni va’da bergan.
Izoh (0)