AQSh Turkiyadan uzoqlashib ketmadi va bu Vashington uchun yaxshi yangilik. Moskva esa fursatdan foydalanib Anqaraga yaqinlashishni boshlagandi.
Turkiyaning “Tinchlik bulog‘i” operatsiyasi muvaffaqiyatli o‘tdimi, ko‘zlangan maqsadlar amalga oshdimi? Maqsadlarning ayrimlari amalga oshmadi. Sababi turklar avvaliga Suriya bilan chegaraning 420 km masofasini egallab, qo‘shni davlat hududidagi 30 km kenglikdagi “xavfsiz hudud” tashkil qilib, u yerga 2 million qochoqni ko‘chirmoqchi edi. Yakunda ikkita aholi yashash punkti egallandi, boshqa ikki obyekt esa rasmiy Damashq ixtiyoriga o‘tdi. Amerika esa Manbijni Turkiyaga emas, balki Rossiyaga topshirdi.
Anaqaraning ikkinchi maqsadi Kurdiston ishchi partiyasi jangarilarini Suriya chegarasidan uzoqlashtirish amalga oshdi. Kurdlar Turkiya chegaralaridan 30 km janub tomonga ketadi va buni muvaffaqiyat deyish mumkin. Turkiya hukumatining muxolifati ham ushbu harbiy harakatlarni aynan shu maqsad sabab qo‘llab-quvvatlagandi. Bu borada erishilgan natijani “Tinchlik bulog‘i”ning yutug‘i deb baholash mumkin.
Anqaraning bu boradagi ikkinchi yutug‘i — AQSh kurdlarga bergan og‘ir artilleriya qurollari ortga qaytarilishi. Bu masalada Turkiya hamda AQSh o‘rtasida munozara kelib chiqishi mumkin. Sababi Vashington kurdlarga og‘ir artilleriya qurollarini bermaganligini ta’kidlagan.
Shuningdek, operatsiyaning to‘xtatilganligini ham to‘g‘ri qaror deb baholash mumkin. Chunki Turkiya va kurdlar o‘rtasidagi harbiy harakatlar natijasida ko‘plab odamlar qurbon bo‘layotgandi va bu turklarning xalqaro maydondagi obro‘sini keskin tushirib, dunyo jamoatchiligi Anqarani “Tinchlik bulog‘i” operatsiyasi sabab qoralashiga sabab bo‘layotgandi.
E’tiborni tortadigan yana bir jihat bu IShIDning qayta tug‘ilishiga sharoit yaratish mas’uliyati ham Turkiyaning zimmasiga tushganligi bo‘ldi. Tramp ham dunyoning boshqa yetakchi davlatlarining rahbarlari ham jarayon uchun javobgarlik Anqara zimmasida bo‘lishini qayd etgan.
120 soat davom etadigan “Tinchlik bulog‘i”ning tanaffusidan keyin AQSh hamda Kurdiston ishchi partiyasi, Moskva va Damashq, Turkiya va kurdlar, Damashq—Anqara—Moskva munosabatlari qanday bo‘lishini yana kuzatish mumkin.
Erdo‘g‘on hamda Pens o‘rtasidagi muzokaralar 1 soat-u 40 daqiqa, AQSh hamda Turkiya delegatsiyalarining uchrashuvi esa 2 soat-u 40 daqiqa davom etgan.
Izoh (0)