14 октябрь куни Барселонада 2017 йилда ўтказилган минтақа мустақиллиги тўғрисидаги референдум ташкилотчиларига нисбатан қамоқ жазоси қўлланилишига қарши оммавий намойишлар бошланди, деб хабар беради Meduza.
Намойишлар бутун Барселона бўйлаб, жумладан, шаҳарнинг марказий Виа Лаетана кўчасида ҳам кузатилмоқда.
Намойишчилар қамалган сиёсатчилар озод қилинишини талаб қилиб шаҳарнинг тўртта асосий кўчасидаги ҳаракатни тўхтатиб қўйган.
Барселонадан 100 километр узоқликда жойлашган Жиронда одамлар шаҳарлараро ва Францияга борадиган поездлар ҳаракатини тўхтатиб қўйган.
Каталониялик сиёсатчилар қамоқ жазосига ҳукм қилинганидан сўнг «Демократик сунами» ташкилоти ўзининг 150 минг нафар тарафдорларини Барселона марказидан 15 километр узоқликда жойлашган Эл-Прат аэропорти ишини тўхтатишга чорлади.
«Бутун дунё бўйлаб бизнинг овозимизни эшитишлари керак бўлган пайт келди. Мақсад — Барселона аэропорти ишини тўхтатиш», —дейилади ташкилот хабарида.
Минглаб намойишчилар Барселона аэропорти бўйлаб юриб, автомагистраллардаги ҳаракатни тўхтатиб қўйди. Шунингдек, улар маълум муддатга метро ва темир йўллар ҳаракатини ҳам тўхтатиб қўйган.
Ўша куни бошқа давлатларга учиши керак бўлган одамлар аэропортга пиёда боришга мажбур бўлди.
Аэропорт яқинида саккиз мингга яқин одам тўпланди. Испания полицияси қарата дубинка ва резина ўқлардан фойдаланиб намойишчиларни тарқата бошлади.
Қайд этилишича, шифокорлар кун давомида Барселонада асосан аэропортда 56 нафар жабрланувчига тиббий ёрдам кўрсатган.
Барселона аэропортида камида 20 та рейс бекор қилинган. Бундан ташқари, «Демократик цунами» ташкилоти 1200 га яқин автомобиль Мадрид—Барахас аэропортига киришни тўсиб қўйган.
Изоҳ (0)