Saudiya Arabistoni qirg‘oqlariga yaqin hududda hujumga uchragan neft tankeri Sabiti Bob al-Mandib bo‘g‘oziga kirgan va to‘qqiz kun ichida Bender Abbos portiga yetib keladi. Bu haqda Eron portlari va kemasozlik tashkilotining rahbari Muhammad Rastad ma’lum qildi, deb xabar bergan “TASS”.
“Tanker Bob al-Mandib bo‘g‘oziga kirgan va yaqin vaqt ichida Aden ko‘rfaziga yetadi, so‘ngra Hind okeani orqali O‘rmuz bo‘g‘ozi tomon harakatlanadi. To‘qqiz kun ichida tanker Eronning Bender Abbos portiga keladi”, — deya ta’kidlagan Rastad.
Uning so‘zlariga ko‘ra, tanker ekipaji birgalikda harakat qilib neft oqimini to‘xtatgan va atrof-muhit ifloslanishining oldini olgan.
Eron milliy neft kompaniyasiga tegishli Sabiti tankerida 11-oktabr, juma kuni Jidda porti yaqinida ikkita portlash sodir bo‘lgan, natijada kema rezervuarlaridan Qizil dengizga neft oqib ketgandi.
Kemadagi portlash haqida xabar qilgan mahalliy va xorijiy nashrlarning aksariyati portlashlar ikkita raketaning kemaga kelib urilishi natijasida sodir bo‘lgan degan taxminni ilgari surgan.
Izoh (0)