Axborot va ommaviy kommunikatsiyalar agentligi direktori Komil Allamjonov Samarqandda tashkil qilingan YeXHTga a’zo mamlakatlar elchilari ishtirokidagi O‘zbekistonda so‘z va matbuot erkinligiga bag‘ishlangan xalqaro davra suhbatida nutq so‘zlab, o‘zbek matbuotining bugungi holati haqida gapirdi.
Xususan, AOKA rahbari 1991-yilning oktabr oyida O‘zbekiston Oliy Kengashining sessiyasida so‘zga chiqqan deputatlarning nutqlarida so‘z erkinligining haqiqiy va samimiy ko‘rinishi namoyon bo‘lganini aytib o‘tgan.
Allamjonovning qayd etishicha, aynan o‘sha davr bugun qurilayotgan demokratik jamiyatning boshlanishi bo‘lgan. Biroq ba’zi sabablarga ko‘ra, bu erkinlik uzoqqa cho‘zilmagan. Yillar davomida o‘zbek matbuotining o‘rni zaiflashib, u faqat maqtov va targ‘ibot mashinasiga aylanib qolgan. Tanqid qilgan yoki haqiqatni gapirganlarning ovozi o‘chirilgan yoki chet davlatlarning ayg‘oqchisi sifatida ko‘rilgan.
Shavkat Mirziyoyev prezidentligi davrining boshida matbuot sohasida yuzaga kelgan vaziyat haqida gapirgan agentlik rahbari 25 yillik yopiqlikdan ozodlikka chiqqan matbuot barchani esankiratib qo‘yganini ta’kidladi. “Avvaliga jurnalistlar tajribasizlikdan qiynalgan bo‘lsa, davlat va hokimiyat organlari ular tomonidan ko‘tarilgan achchiq haqiqatni hazm qila olmadi”, — dedi AOKA direktori.
Komil Allamjonov o‘z nutqida O‘zbekistonda matbuot erkin emas, so‘z erkinligi yo‘q, deb gapirayotganlarga bu ishlar bir kunda amalga oshmasligini aytgan va bunga tashqaridan turib qat’iy va keskin baho bermaslikni so‘ragan.
“Rim bir kunda qurilmaganidek o‘zbek matbuoti ham haqiqiy 4-hokimiyat darajasiga yetishiga hali vaqt kerak va biz buni yaxshi tushunamiz”, — deb fikrini xulosalagan AOKA rahbari.
Izoh (0)