Ахборот ва оммавий коммуникациялар агентлиги директори Комил Алламжонов Самарқандда ташкил қилинган ЕХҲТга аъзо мамлакатлар элчилари иштирокидаги Ўзбекистонда сўз ва матбуот эркинлигига бағишланган халқаро давра суҳбатида нутқ сўзлаб, ўзбек матбуотининг бугунги ҳолати ҳақида гапирди.
Хусусан, АОКА раҳбари 1991 йилнинг октябрь ойида Ўзбекистон Олий Кенгашининг сессиясида сўзга чиққан депутатларнинг нутқларида сўз эркинлигининг ҳақиқий ва самимий кўриниши намоён бўлганини айтиб ўтган.
Алламжоновнинг қайд этишича, айнан ўша давр бугун қурилаётган демократик жамиятнинг бошланиши бўлган. Бироқ баъзи сабабларга кўра, бу эркинлик узоққа чўзилмаган. Йиллар давомида ўзбек матбуотининг ўрни заифлашиб, у фақат мақтов ва тарғибот машинасига айланиб қолган. Танқид қилган ёки ҳақиқатни гапирганларнинг овози ўчирилган ёки чет давлатларнинг айғоқчиси сифатида кўрилган.
Шавкат Мирзиёев президентлиги даврининг бошида матбуот соҳасида юзага келган вазият ҳақида гапирган агентлик раҳбари 25 йиллик ёпиқликдан озодликка чиққан матбуот барчани эсанкиратиб қўйганини таъкидлади. «Аввалига журналистлар тажрибасизликдан қийналган бўлса, давлат ва ҳокимият органлари улар томонидан кўтарилган аччиқ ҳақиқатни ҳазм қила олмади», — деди АОКА директори.
Комил Алламжонов ўз нутқида Ўзбекистонда матбуот эркин эмас, сўз эркинлиги йўқ, деб гапираётганларга бу ишлар бир кунда амалга ошмаслигини айтган ва бунга ташқаридан туриб қатъий ва кескин баҳо бермасликни сўраган.
«Рим бир кунда қурилмаганидек ўзбек матбуоти ҳам ҳақиқий 4-ҳокимият даражасига етишига ҳали вақт керак ва биз буни яхши тушунамиз», — деб фикрини хулосалаган АОКА раҳбари.
Изоҳ (0)