Rossiyaning Perm shahrida 17-avgust kuni shahar avtobusi YTHga uchrab binoga urilgan edi. Oqibatda bir odam hodisa joyida vafot etgan, 32 dan ortiq shaxs jarohat olgan. Mashg‘ulotga ketayotgan Danil Yo‘ldoshev to‘xtab, ularga yordam bergandi. U qiyshayib ketgan orqa eshiklarni buzib, avtobusdan odamlarni olib chiqqan va o‘tib ketayotgan mashinalar haydovchilaridan jarohatlanganlarni kasalxonaga olib borishni so‘ragan. “Tez yordam” kelganidan so‘ng ham shifokorlarga yordam berishda davom etgan.
Toshkentda o‘sib ulg‘aygan, oilaviy sharoitlar sabab Rossiyaga yo‘l olib, bir necha yillar mobaynida o‘sha yerda istiqomat qilib kelayotgan Danil Yo‘ldoshev O‘zbekiston Mehnat vazirligi jamoasiga qabul qilindi, deb xabar beradi vazirlik matbuot xizmati.
“Faol fuqarolik pozitsiyasiga ega Danil Yo‘ldoshev kabi yoshlar yordamida huquqiy-demokratik davlat barpo etish mumkin. Shuning uchun ham Rossiya Danilga o‘z fuqaroligini taklif qildi. Biroq u o‘zini tug‘ilgan yurtining rivoji uchun javobgar biladi. Mana shu niyatini amalga oshirish, o‘zini, imkoniyatlarini ko‘rsatsin deya Bandlik va mehnat munosabatlari vazirligi Danil Yo‘ldoshevni o‘z safiga qo‘shdi, uni ishga qabul qildi.
O‘ylaymizki, uning faol fuqarolik pozitsiyasiga ega ekani, harakatchanligi, eng muhimi, atrofida sodir bo‘layotgan hodisalarga befarq emasligi faoliyati davomida asqatadi”, — deyiladi xabarda.
Izoh (0)