Samarqand viloyatining Toyloq va Ishtixon tumanlarida sud uchun yangi binolar foydalanishga topshirildi. Bu haqda “Daryo”ga Oliy sud matbuot xizmati xabar berdi.
Ma’lum qilinishicha, Toyloq tumanidagi binoga 7 milliard so‘m, Ishtixon tumanidagi binoga esa 6 milliard 139 million so‘m sarflangan.
Ta’kidlanishicha, to‘rtta sudning bir binoda faoliyat yuritishi O‘zbekistonda birinchi marotaba kuzatilmoqda.
Har ikki binoda tumandagi jinoyat, fuqarolik ishlari va ma’muriy sud, shuningdek, tumanlararo iqtisodiy sud faoliyat yuritadi.
Shuningdek, har bir sud uchun belgilangan tartib bo‘yicha ma’muriy xonalar, sud zallari, fuqarolarni qabul qilish uchun maxsus xonalar ajratilgan.
Toyloq tumanidagi binoda o‘rnatilgan infokiosk orqali fuqarolar o‘zlari da’vo arizasini kiritishi, sud hukmidan nusxa olishi mumkin.
“Ishtixon tumanidagi binoda video konferensiya aloqasi mavjudligi, sud qabulxonasida ona-bola xonasi faoliyati yo‘lga qo‘yilgan”, — deyiladi xabarda.
Izoh (0)