Adliya vazirligida bo‘lib o‘tgan “Sud-huquq tizimidagi bo‘shliqlar va ularni bartaraf etish choralari” mavzusidagi davra suhbatida tuman, shahar va viloyat miqyosida faoliyat yuritayotgan to‘rtta sud tizimini birlashtirish taklif etildi, deb xabar beradi O‘zA.
O‘zbekiston “Adolat” sotsial-demokratik partiyasi siyosiy kengashi tomonidan tashkil etilgan tadbirda sohada uchrayotgan muammolar tahlil qilinib, sud hokimiyatining chinakam mustaqilligi, fuqarolar huquq va erkinliklarining ishonchli himoyasini ta’minlash hamda odil sudlovga erishish darajasini oshirish xususida so‘z bordi.
Ta’kidlanishicha, sud-tergov amaliyoti va qonun hujjatlarining tahlili hamda aholi bilan ochiq muloqot natijalari sud amaliyotida qonuniylik va xolislikni ta’minlashga to‘sqinlik qiluvchi qator huquqiy bo‘shliqlar mavjudligini ko‘rsatdi.
Ishtirokchilar “Adolat” SDPning yangi saylovoldi loyihasining sud-huquq sohasiga oid yo‘nalishini keng muhokama qilib, ushbu tizimdagi islohotlar natijasini tahlil etdi. Xususan, sohada aholining noroziligiga sabab bo‘layotgan omillar tanqidiy o‘rganildi.
“Adolat” sotsial-demokratik partiyasi ekspertlari tomonidan tuman, shahar va viloyat miqyosida faoliyat yuritayotgan to‘rtta sud tizimini birlashtirish taklif etilmoqda. Bu tumanlararo fuqarolik va iqtisodiy ishlar bo‘yicha sudlarni tugatib, har bir tuman va shaharda ushbu toifa ishlarni ko‘radigan sudyalarni ixtisoslashtirishni taqozo etadi.
“Yaqinda ikki yuridik tashkilotning mojarosi iqtisodiy sudda ko‘rib chiqildi. Bir oydan ko‘proq vaqt davom etgan sudda aniqlanishicha, yuridik tashkilotlarning biridagi xodim xatosi o‘sha muammoga sabab bo‘lgan. Ishga fuqaro aralashgani sabab iqtisodiy sud sudyasi ishni fuqarolik sudiga yuborishga majbur bo‘ldi. Aslida iqtisodiy sudga oid ko‘plab masalalar fuqarolik sudiga borib taqaladi. Rostdan ham bu tizimni tartibga solish kerak. Jismoniy va yuridik shaxslar ovora bo‘lmasin, sudlar o‘ziga tegishli bo‘lmagan ishga vaqt yo‘qotmasin”, — dedi Toshkent davlat yuridik universiteti katta o‘qituvchisi Gulruh Mamaraimova.
Partiya oldida turgan vazifalar qatoridan advokatura mavqeyini oshirish, sud bosqichida prokuror va advokat vakolati tengligini ta’minlash, ma’muriy huquqbuzarlik to‘g‘risidagi barcha ma’muriy ishlar faqat sud tomonidan ko‘rilishini ta’minlash o‘rin olgan.
Partiya ekspertlari tomonidan barcha takliflar e’tiborga olinishi ta’kidlandi. Partiya saylovoldi dasturining ayrim bandlarini tahrir qilish lozimligi asoslab berildi. Yakunda xulosalar umumlashtirilib, partiya saylovoldi dasturida aks ettirilishi belgilandi.
Izoh (0)