2018-yil oktabr oyida “Daryo” nashri orqali samarqandlik tadbirkor Jamshid Shomurodov viloyat hokimining tadbirkorlar bilan uchrashuvida muammosi hal etilmayotganligi to‘g‘risida murojaat qilgandi. Oradan bir yil o‘tgan bo‘lsa-da, hamon tadbirkorning muammosi tegishli tashkilotlar tomonidan o‘rganilgani yo‘q. Bu haqda “Daryo” muxbiri Farhod Norbo‘tayev ma’lum qildi.
O‘tgan yili haqiqat izlab 8 marotaba shahar prokuraturasi, 20 marotaba viloyat prokuraturasi, 8 bor Bosh prokuratura, 10 marotaba Xalq qabulxonasi, 3 bora viloyat hokimi Erkinjon Turdimovga murojaat qilgan Jamshid Shomurodov 2019-yil davomida ham huquqni muhofaza qiluvchi idoralarga ko‘p qatnagan. Hatto Bosh prokuror qabuliga ham kirgan. Biroq shuncha murojaatlarga qaramasdan tegishli tashkilotlar tomonidan masala paysalga solinib, ko‘rilmay kelinmoqda.
Samarqand shahar hokimining 2015-yil 27-noyabrdagi “Ko‘p qavatli turar joy binosini qurishga ruxsat berish haqida”gi qarori bilan “Garant quruvchi servis” mas’uliyati cheklangan jamiyatiga Samarqand shahar, Gagarin ko‘chasi, 128-manzilda joylashgan uyni qonun talablari asosida buzgan holda qaytadan yangi bino qurish uchun ruxsat berilgan. Mazkur qarorda tarkibida noturarjoy binolari mavjud bo‘lgan besh qavatli turar joy binosida yashayotgan fuqarolarga tegishli xonadonlarni amaldagi qonun hujjatlarida belgilangan tartibda ko‘chirish belgilangan. Qurilishi rejalashtirilgan ko‘p qavatli turar joy binosining birinchi qavatidan buzilishga tushgan binosiga mutanosib ravishda o‘z tannarxi qiymatida ajratib berish sharti bilan buzilishdan bo‘shagan jami 2122 kvadrat metr yer maydoni ajratish to‘g‘risidagi dalolatnoma tasdiqlanib, zamonaviy arxitektura loyihalari asosida ko‘p qavatli turar joy binosi qurilishga ruxsat berilgan.
Samarqand shahar hokimining 2016-yil 19-dekabrdagi qarori bilan 2015-yil 27-noyabrdagi qarorga o‘zgartirish va qo‘shimchalar kiritilgan. Qarorning 1-bandida “Garant quruvchi servis” MChJga Samarqand shahar, Fitrat ko‘chasi 1-yo‘lak, 1, 3, 5 va 7-xonadonlar hamda Gagarin ko‘chasi, 128 va 130-manzildagi ko‘p qavatli turar joy egalarini amaldagi qonun hujjatlarida belgilangan tartibda ko‘chirish sharti bilan shahar hokimligi yer komissiyasining 2016-yil 10-sentabrdagi 48-sonli “Qurish uchun tanlangan yer maydoni dalolatnomasi” tasdiqlangan va zamonaviy arxitektura loyiha hujjatlari asosida ko‘p qavatli turar joy binolari qurilishga ruxsat berilgan deb o‘zgartirish kiritilgan.
— Mulk huquqi asosida menga tegishli bo‘lgan uylar “Garant quruvchi servis” MChJ tomonidan kompensatsiya masalasi hal etilmasdan, meni roziligim olinmasdan buzib tashlangan, — deydi Jamshid Shomurodov. — Xususan, Samarqand shahar, Gagarin ko‘chasi 128-manzildagi ko‘p qavatli turar joy binosining 58, 61, 62 va 64-xonadonlari buzib tashlangan.
Jamshid Shomurodovning ta’kidlashicha, bundan tashqari, 2007-yilning 31-avgustida imzolangan 2872-sonli oldi-sotdi shartnomasida ko‘rsatilgan 77-xonadon, 2008-yilning 27-may kuni imzolangan oldi-sotdi shartnomasidagi 105-xonadon, 2002-yil, 12- fevral kuni imzolangan 202-sonli oldi-sotdi shartnomasida ko‘rsatilgan 59-xonadon, 2009-yilning 1-aprel kuni imzolangan 31-sonli oldi-sotdi shartnomasida ko‘rsatilgan 33-xonadon, 2004- yilning 20-oktabr kuni 2872-sonli oldi-sotdi shartnomasida ko‘rsatilgan 55-xonadon va fuqaro Nuriya Botirovadan sotib olingan 32-xonadon sudning hal qiluv qarorisiz noqonuniy buzib tashlangan. Qolaversa, mazkur xonadonlar ichidagi jihozlar ham talon-toroj qilingan.
—Prezident Shavkat Mirziyoyev 2019-yil 3-avgust kuni “Fuqarolar va tadbirkorlik subyektlarining mulk huquqi kafolatlanishini so‘zsiz ta’minlash bo‘yicha qo‘shimcha chora-tadbirlar to‘g‘risida”gi farmoyishini imzoladi. Samarqand viloyatida mazkur qaror ijrosini ta’minlashni nazorat qilish bosh prokuror o‘rinbosari S.Saidkarimov zimmasiga yuklatilgan,— deydi Jamshid Shomurodov. – Biroq Prezident farmoyishida aynan ushbu masalalar bo‘yicha prokuratura shug‘ullanishini ko‘rsatib o‘tilgan bo‘lsa-da, Samarqand shahar prokuraturasi farmoyishga zid ravishda mening arizamni ko‘rib chiqmasdan Samarqand shahar IIO FMB TB bo‘limiga yuborgan.
Vazirlar Mahkamasining 2006-yil 29-maydagi 97-sonli qarori bilan tasdiqlangan “Yer uchastkalari davlat va jamiyat ehtiyojlari uchun olib qo‘yilgan fuqarolarga va jismoniy shaxslarga yetkazilgan zararni qoplash tartibi to‘g‘risida”gi nizomning 9-bandi talabiga ko‘ra, muammo Samarqand shahar hokimligi huzuridagi tovon berish, yetkazilgan zararlar miqdori va kompensatsiya turini belgilash bo‘yicha komissiya tomonidan ko‘rib chiqilmagan. Jamshid Shomurodovga tegishli bo‘lgan buzilgan xonadonlar uchun bugungi kunga qadar kompensatsiya masalasi hal etilmagan.
Kompensatsiya masalasi hal etilmaganligining sabablaridan biri “Samarqand shahar hokimligi huzuridagi buzilishga tushgan turar va noturar joy hamda ko‘chiriladigan daraxtlar uchun to‘lov miqdori masalasini ko‘rib chiqishda to‘lov miqdorini va kompensatsiya turini belgilash bo‘yicha komissiya tarkibini tasdiqlash to‘g‘risida”gi shahar hokimining 2019-yil 18-apreldagi qarori kech qabul qilingan.
Masalaning yana bir tomoni shundaki, “Garant quruvchi servis” mas’uliyati cheklangan jamiyati 2018-yilning 27-aprel kuni 893858-sonli reyestr raqam bilan qayta davlat ro‘yxatidan o‘tkazilib, boshqa jamiyat bilan birlashgan va “Next City” mas’uliyati cheklangan jamiyati nomini olgan. Ya’ni “Garant quruvchi servis” MChJ Jamshid Shomurodov bilan bog‘liq muammolarni bartaraf etmasdan turib masalaga uchinchi tashkilotni ham aralashtirgan.
— Samarqand shahar va viloyat prokuraturasi, ichki ishlar boshqarmalariga ikki yildan buyon qayta-qayta murojaat qilib kelaman. Ammo buzilgan 15 milliard so‘mlik mulklarim uchun hali ham bir tiyin ololganim yo‘q. Buning o‘rniga huquq-tartibot idoralari Jinoyat kodeksining 228-moddasi (“Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish”) tegishli bandlari bilan jinoyat ishi qo‘zg‘atib, keyinchalik jinoyat ishi to‘xtatildi. Bugungacha murojaat qilmagan joyim qolmadi hisob. Barchasiga bir xil javob olaman: “mulk egalarining rozilik xatlari olingan, Vazirlar Mahkamasining tegishli qarorlariga asoslanib, uy buzilgan” degan mazmunda. Aniqroq aytadigan bo‘lsam, men mulklarimdan ajralib murojaat qilyapman, men murojaat qilgan idoralar esa ustimdan kulgandek “zarar qoplangan” demoqda. Shu yolg‘on ma’lumot respublika idoralariga ham taqdim etilmoqda, — deydi tadbirkor Jamshid Shomurodov.
Izoh (0)