Buyragi transplantatsiya qilingan 20 nafardan ortiq bemor Sog‘liqni saqlash vazirligiga shikoyat bilan bordi. Sog‘liqni saqlash vazirligi tomonidan bemorlarga tekinga berilayotgan “Pangraf” dorisi o‘rniga “Roligraf” nomli dori kasallarning ahvolini yaxshilashdan ko‘ra, og‘irlashishiga sabab bo‘lmoqda, deb xabar beradi “Togri.uz”.
3-oktabr kuni Sog‘liqni saqlash vazirligiga buyragi transplantatsiya qilingan 20 nafardan ortiq bemor shikoyat bilan borgan. Shikoyatchilar respublikaning barcha viloyatlaridan kelgan bo‘lib, aksar kelganlar buyragi transplantatsiya qilingan bemorlardir. Hammasining shikoyati bitta — Sog‘liqni saqlash vazirligi tomonidan bemorlarga tekinga berilayotgan “Pangraf” dorisi o‘rniga “Roligraf” nomli dori berilmoqda. Bu esa ko‘pgina kasallarning ahvolini og‘irlashtirgan.
“Yig‘ilganlarning asosiy shikoyati dorini o‘zgartirmaslik bo‘lsa, keyingisi — vaqtida berilishi. Bir-ikki oy vaqtida tarqatilgan dori sababsiz to‘xtab qolishi ham hayoti “qil” ustida turganlarni tashvishga qo‘ymoqda”, — deyiladi xabarda.
Ta’kidlanishicha, transplantatsiyadan so‘ng umrining so‘ngigacha ichiladigan dorini uch kun ichmaslik inson hayotini xavf ostida qoldiradi. Bundan tashqari, bir yilda doimiy ichadigan dorisini uch marta o‘zgartirish saraton kasalligiga olib kelishi mumkin.
Mana shunday muammolar girdobida qolganlar ilojsiz vazirlikka murojaat qilib kelgan. Ular “Roligraf” o‘rniga avvaldan ichib kelgan “Pangraf” dorisi berilishini so‘ramoqda.
Izoh (0)