Qashqadaryodagi ko‘z mikroxirurgiya markaziga AQShdan zamonaviy apparat keltirildi. Bungacha ko‘zga sun’iy gavhar qo‘yish amaliyoti qo‘lda bajarilgan

Ko‘zga sun’iy gavhar qo‘yish amaliyoti qo‘lda bajarilgan Qashqadaryo viloyatidagi ko‘z kasalliklari shifoxonasiga AQShda ishlab chiqarilgan zamonaviy apparat keltirildi. Bu haqda “Daryo”ga viloyat sog‘liqni saqlash boshqarmasi axborot xizmati rahbari Nuriddin Egamov xabar bermoqda.

Nuriddin Egamovga ko‘ra, viloyatda yangi “Fakoemulsifikator” apparati yordamida ilk bor jarrohlik amaliyoti o‘tkazilgan.

Ma’lum qilinishicha, Respublika ixtisoslashtirilgan ko‘z mikroxirurgiyasi ilmiy-amaliy tibbiyot markazi direktori o‘rinbosari Vohid Ro‘ziqulovning ikki kun davom etgan “master-klassi” davomida 17 ta jarrohlik amaliyoti o‘tkazilgan. Jami 41 nafar bemor ambulator ko‘rikdan o‘tkazilib, aniq tashxis qo‘yilgan.

— Viloyat hokimligi tomonidan viloyat ko‘z kasalliklari shifoxonasiga zamonaviy tibbiy uskunalar olish uchun 1 milliard 100 million so‘m mablag‘ ajratilgan edi, - deydi viloyat ko‘z kasalliklari shifoxonasi bosh shifokori Bahriddin Eshdavlatov. — Mazkur mablag‘ hisobidan AQSh da ishlab chiqarilgan zamonaviy “Fakoemulsifikator” apparati, Janubiy Koreyaning “OST” (ko‘z tomografiyasi) uskunasi keltirildi va yashil lazer uskunasi keltirilishi ko‘zda tutilmoqda.

Aniqlanishicha, shu paytga qadar shifoxonada ko‘zga sun’iy gavhar qo‘yish amaliyoti qo‘lda bajarilgan.

— Bunda shoh parda 12 millimetr kesilar edi — deydi shifokor Shokir Lutfullayev. — Bu esa kattagina kesim jarohatiga sabab bo‘lar edi. “Fakoemulsifikator”da shu kesim 2 mmdan 2,8 millimetrgachani tashkil etadi. Mazkur uskunani amaliyotda ishlatish orqali kesim jarohati kichrayadi, jarohat tez bitadi, jarrohlik amaliyoti vaqti, bemorning statsionarda qolish davomiyligi qisqaradi, uni ambulator sharoitda davolab, bir kunda javob berish imkoniyati vujudga keladi. Bu dunyo oftolmologiyasida katarakta amaliyotining “oltin standarti” hisoblanadi.

—“Operatsiya” o‘n daqiqa ham davom etgani yo‘q, — deydi bemor, Chiroqchi tumani Ko‘ktosh qishlog‘ilik Abdurasul bobo Kenjayev. — Baraka topishsin do‘xtirlar, “kompyuter-apparat”i bilan o‘ng ko‘zimga bir zumda gavhar qo‘yishdi. Ertaga uyga ruxsat beramiz deyishyapti.

Qayd etilishicha, shifoxonaga yashil lazer uskunasi keltirilishi ham kutilmoqda. Bu apparat orqali ikkilamchi kataraktada lazer jarrohlik amaliyoti qon ketishsiz, og‘riqsiz, qisqa muddat — 20 daqiqada yakunlanadi.