Қашқадарёдаги кўз микрохирургия марказига АҚШдан замонавий аппарат келтирилди. Бунгача кўзга сунъий гавҳар қўйиш амалиёти қўлда бажарилган

Кўзга сунъий гавҳар қўйиш амалиёти қўлда бажарилган Қашқадарё вилоятидаги кўз касалликлари шифохонасига АҚШда ишлаб чиқарилган замонавий аппарат келтирилди. Бу ҳақда «Дарё»га вилоят соғлиқни сақлаш бошқармаси ахборот хизмати раҳбари Нуриддин Эгамов хабар бермоқда.

Нуриддин Эгамовга кўра, вилоятда янги «Факоэмульсификатор» аппарати ёрдамида илк бор жарроҳлик амалиёти ўтказилган.

Маълум қилинишича, Республика ихтисослаштирилган кўз микрохирургияси илмий-амалий тиббиёт маркази директори ўринбосари Воҳид Рўзиқуловнинг икки кун давом этган «мастер-класси» давомида 17 та жарроҳлик амалиёти ўтказилган. Жами 41 нафар бемор амбулатор кўрикдан ўтказилиб, аниқ ташхис қўйилган.

— Вилоят ҳокимлиги томонидан вилоят кўз касалликлари шифохонасига замонавий тиббий ускуналар олиш учун 1 миллиард 100 миллион сўм маблағ ажратилган эди, - дейди вилоят кўз касалликлари шифохонаси бош шифокори Баҳриддин Эшдавлатов. — Мазкур маблағ ҳисобидан АҚШ да ишлаб чиқарилган замонавий «Факоэмульсификатор» аппарати, Жанубий Кореянинг «OST» (кўз томографияси) ускунаси келтирилди ва яшил лазер ускунаси келтирилиши кўзда тутилмоқда.

Аниқланишича, шу пайтга қадар шифохонада кўзга сунъий гавҳар қўйиш амалиёти қўлда бажарилган.

— Бунда шоҳ парда 12 миллиметр кесилар эди — дейди шифокор Шокир Лутфуллаев. — Бу эса каттагина кесим жароҳатига сабаб бўлар эди. «Факоэмульсификатор»да шу кесим 2 ммдан 2,8 миллиметргачани ташкил этади. Мазкур ускунани амалиётда ишлатиш орқали кесим жароҳати кичраяди, жароҳат тез битади, жарроҳлик амалиёти вақти, беморнинг стационарда қолиш давомийлиги қисқаради, уни амбулатор шароитда даволаб, бир кунда жавоб бериш имконияти вужудга келади. Бу дунё офтолмологиясида катаракта амалиётининг «олтин стандарти» ҳисобланади.

—«Операция» ўн дақиқа ҳам давом этгани йўқ, — дейди бемор, Чироқчи тумани Кўктош қишлоғилик Абдурасул бобо Кенжаев. — Барака топишсин дўхтирлар, «компьютер-аппарат»и билан ўнг кўзимга бир зумда гавҳар қўйишди. Эртага уйга рухсат берамиз дейишяпти.

Қайд этилишича, шифохонага яшил лазер ускунаси келтирилиши ҳам кутилмоқда. Бу аппарат орқали иккиламчи катарактада лазер жарроҳлик амалиёти қон кетишсиз, оғриқсиз, қисқа муддат — 20 дақиқада якунланади.