Farg‘ona viloyati hokimligi axborot xizmati “Ozodlik” radiosida e’lon qilingan “Farg‘ona hokimi Shuhrat G‘aniyev tungi selektorga chaqirtirgan maktab rahbarlari avariyada halok bo‘ldi” nomli maqolaga nisbatan rasmiy bayonot bilan chiqdi.
Yolg‘on, taxminiy, tuhmat axborot tarqatishning “haddini olgan” “Ozodlik” radiosi Farg‘ona viloyatida yo‘l harakati hodisasi tufayli ikki nafar halok bo‘lgan va 2 nafar shifoxonaga tushgan Dang‘ara tumanidagi maktab direktor o‘rinbosarlari fojiasini viloyat hokimi Shuhrat G‘aniyevga bog‘lamoqchi bo‘lganlar.Avvalroq, Ichki ishlar vazirligi ijtimoiy tarmoqlarda Farg‘ona viloyati hokimining tungi selektor yig‘ilishiga ketayotgan ikki maktab direktori o‘rinbosari ishtirokida sodir bo‘lgan YTH to‘g‘risidagi xabarlarga munosabat bildirgan edi.Farg‘ona viloyati hokimligi yo‘l-transport hodisasida halok bo‘lganlar oila a’zolariga chuqur hamdardlik bildiradi. Jarohat olganlar tezroq sog‘ayib ketishini tilaydi.
Farg‘ona viloyati hokimligi axborot xizmati “Ozodlik”ning tuhmatchi jurnalistlari iddao qilayotganidek, 30-sentabrga o‘tar kechasi Farg‘ona viloyat hokimligida hech qanday selektor yig‘ilishi o‘tmaganligini, boshqa biron-bir sabablar bilan ham hech kim, jumladan, Dang‘ara tumanida avtohalokatga uchragan shaxslar viloyat hokimligiga chaqirilmaganini bildiradi.
Bu Farg‘ona viloyati hokimi Shuhrat G‘aniyevga, davlat boshqaruv idoralariga qarshi g‘arazli niyatda atayin uyushtirilayotgan, O‘zbekistonda ijtimoiy-siyosiy vaziyatni izdan chiqarish, fuqarolarning noroziligini shakllantirishga qaratilgan qabih rejaning amaliy ijrosidan bo‘lak narsa emas.
Shu munosabat bilan Farg‘ona viloyati hokimligi axborot xizmati mamlakatimiz aholisi, internet, ijtimoiy tarmoq foydalanuvchilarini bunday tuhmat o‘yinlariga ishonmaslikka, ularga munosib javob berib xalqimiz birdamligini mustahkamlashga chaqiradi.
Farg‘ona viloyati hokimligi axborot xizmati
Izoh (0)