“Tolibon” harakati Afg‘onistonning o‘z nazorati ostida bo‘lgan hududlarida Qizil Xoch xalqaro qo‘mitasining faoliyatiga qo‘yilgan taqiqni bekor qildi. Bu haqda “Tolibon” vakili Zabihulla Mujahidning bayonotiga tayanib, “Kommersant” xabar berdi.
Joriy yilning aprel oyida “Tolibon” jangarilari Qizil Xoch qo‘mitasi va Butunjahon sog‘liqni saqlash tashkilotining faoliyatiga taqiq qo‘ygandi. Ularning ta’kidlashicha, ushbu tashkilotlar vaksinatsiya vaqtida “shubhali” tadbirlarni o‘tkazgan va o‘z vakolatlari doirasida ish ko‘rmagan.
Taqiqning bekor qilinishi nimaga bog‘liq ekanligi noma’lum. Qizil Xoch va Xalqaro sog‘liqni saqlash tashkiloti ushbu bayonotga izoh bermadi.
Eslatib o‘tamiz, avgust oyida AQSh va “Tolibon” Afg‘onistondagi mojaro bo‘yicha o‘tkazilgan muzokaralar natijasida kelishuvga erishilganini bildirgan edi. AP agentligining ma’lumotlariga ko‘ra, ular Amerika qo‘shinlarini olib chiqib ketish bo‘yicha bir to‘xtamga kelgan. “Tolibon” jangarilari esa o‘z navbatida IShID va “Al-Qoida” kabi terrorchilik guruhlari bilan aloqalarini uzishi kerak bo‘lgan.
Sentabr oyining boshida esa AQSh prezidenti Donald Tramp Kobulda sodir bo‘lgan teraktdan so‘ng, “Tolibon” bilan muzokaralar o‘tkazilmasligini e’lon qilgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)