Saudiya Arabistonidagi neftni qayta ishlash zavodlariga dronlar hujumi yuz bergach, 2019-yil noyabr oyida yetkazib berish sharti bilan sotilayotgan Brent markasidagi neft narxi 13,86 foizga oshib, bir barrel uchun 69,91 dollarga yetgan, deya xabar bermoqda “Kommersant”.
Londonning ICE birjasi ma’lumotlariga ko‘ra, WTI markasidagi neft narxi 11,23 foizga oshib, bir barreli 61,79 dollarga baholangan. Toshkent vaqti bilan 4:30 ga kelib Brent’ning narxi bir barrel uchun 68,05 dollargacha tushgan. WTI’ning narxi esa bir barrel uchun 61,14 dollar bo‘lib turgan edi.
Narxlar Saudiya Arabistonining Saudi Aramco neftni qayta ishlash zavodlariga dronlar vositasida hujum uyushtirilganidan so‘ng yuz bermoqda. Hujum uchun javobgarlikni yamanlik isyonchi xusiylar o‘z zimmasiga olgan. AQSh esa bu hujumlar ortida Eron turibdi, deb bayonot berdi.
Rasmiy Ar-Riyod hujumlardan so‘ng mamlakatda neft qazib olish hajmi 50 foizga qisqarganini ma’lum qildi — bu jahon bo‘yicha qazib olinayotgan kunlik “qora oltin”ning taxminan 5 foizi, degani. Saudiya Arabistoni dushanba oqshomiga qadar neft qazib olish hajmini uchdan birigacha qayta tiklashini bildirgan.
Izoh (0)